Kurti për Nënë Terezën: Ajo u shndërrua në urë, jo në mur
Kryeministri në detyrë i Kosovës, Albin Kurti, ka kujtuar Shën Nënë Terezën në 29-vjetorin e vdekjes së saj, duke vlerësuar kontributin e saj në humanizëm, solidaritet dhe dashuri për njerëzit.
Kurti ka bërë të ditur se me këtë rast është promovuar vepra “Udha misionare e Gonxhe Bojaxhiut drejt Nënë Terezës universale”, e autorëve Skënder Asani dhe Albert Ramaj.
Në një shkrim të publikuar në rrjetet sociale, Kurti ka thënë se edhe tri dekada pas vdekjes së saj, jeta e Nënë Terezës vazhdon të ofrojë mësime për njerëzoren, dashurinë, paqen dhe bamirësinë.
“Shën Nënë Tereza ishte një grua e madhe e dalë nga një komb relativisht i vogël, që ia kushtoi jetën njerëzimit dhe u bë simbol universal i humanizmit, solidaritetit dhe dashurisë për tjetrin”, ka shkruar Kurti.
Ai ka theksuar se vepra e promovuar sjell dëshmi, dokumente, letra dhe fotografi që dokumentojnë rrugëtimin e Gonxhe Bojaxhiut, nga familja shqiptare në Shkup, me prindër nga Prizreni e Gjakova, deri te figura e Nënë Terezës me përmasa universale.
“Siç e kam theksuar edhe në parathënie: ajo u shndërrua në urë, jo në mur” – ka shkruar Kurti.
Kurti ka falënderuar autorët e veprës, duke e cilësuar atë si një kontribut të çmuar për kujtesën dhe dokumentimin e jetës së Nënë Terezës, të cilën e ka përshkruar si një prej figurave më të ndritura që shqiptaria i ka dhuruar botës.
Nobelistja shqiptare Anjezë Gonxhe Bojaxhiu – Nëna Terezë ka lindur më 26.08.1910. Ajo çmohet për kontributin që ka dhënë në ndihmë të të varfërve dhe të pastrehëve.
