Politologu Ermal Hasimja ka komentuar protestën kundër qeverisë, duke deklaruar se ajo që do ta shqetësonte më shumë Edi Ramën do të ishte bashkimi i opozitës me energjinë e protestës.
Në një intervistë për emisionin “Kjo Javë” në News24, Hasimja tha se protesta mund të marrë edhe forma të tjera, përfshirë mosbindjen civile, ndërsa sipas tij, një koordinim i opozitës me protestuesit do të krijonte një situatë që mund ta “shkundte nga themelet” qeverinë.
“Protesta mund të marrë forma të tjera, mosbindje civile dhe këto mund ta shqetësonin. Një gjë tjetër që e trembte Ramën është bashkimi i opozitës dhe i energjisë së protestës. Në fillim kur protesta nisi nga ana e opozitës nuk dinin se si të reagonin. Arsyeja kryesore ka qenë se protesta në dukje ishte kundër problemeve të Zvërnecit ku ishte e përfshirë dhe Kushner. Brenda PD mendohej se mos ndoshta duke mbështetur protestën po dalim kundër amerikanëve, dhe në momentin që u sqaruar ky merak, atëherë PD iu bashkua. Por nëse do të kishte një sinkronizim të këtyre energjive, kjo jo e tremb Ramën por e shkund nga themelet”,- u shpreh Hasimja ndër të tjera.
