Këshilli i Lartë i Prokurorisë, KLP e pati sërish të pamundur të premten që të arrinte kuorumin për vijimin e mbledhjes që ka si objekt shqyrtimin e kërkesës së kandidatit për pozicionin e Prokurorit të Përgjithshë, Ylli Pjetërnikaj, për përjashtimin e anëtarit Vatë Staka nga procedura e përzgjedhjes së aplikantëve, me pretendimin se ai gjendet në kushtet e konfliktit të interesit.
Kërkesat e disa anëtarëve për përjashtimin e kolegëve të tyre, po me pretendimin se gjenden në kushte konflikti interesi, ka futur në ngërç procesin e përzgjedhjes së Prokurorit të Përgjithshëm të Ri, pasi gjatë tre mbledhjeve plenare të fundit të zhvilluara të enjten dhe të premten, ka qenë e pamundur të arrihet kuorumi prej shtatë anëtarësh.
“Është bërë si loja e kungulleshkave”, i tha BIRN në kushtet e anonimatit një burim brenda mbledhjes të zhvilluar paraditen e të premtes.
Zëvendëskryetari i KLP-së, Erind Gërmenji vërejti në çeljen e mbledhjes paraditen e të premtes rreth orës 10:00, se ishte vijim i mbledhjes së të premtes, që u shty për pamundësi të formimit të kuorumit të nevojshëm.
Ai konstatoi se anëtari Sokol Stojani ka kërkuar përjashtimin e kryetares Mirela Bogdani dhe për këtë arsye, ata janë të përjashtuar nga mbledhja. Kërkesa e Stojanit ishte e fundit në radhën e disa kërkesave të ngjashme për përjashtime nga procedura e përzgjedhjes, të cilat kanë futur paradoksalisht në ngërç procesin.
Këshilli u dakordësua që të shqyrtohej fillimisht kërkesa e fundit për përjashtim e të vijohej me radhë, derisa të mbërrihet tek ajo fillestare, kërkesa e prokurorit Pjetërnikaj për përjashtimin e anëtarit Vatë Staka. Sipas praktikës së KLP, kur një anëtar kërkon përjashtimin e një kolegu nga mbledhja, kjo kërkesë shqyrtohet nga Këshilli pa praninë e të dyve. Për rrjedhojë, Bogdani dhe Stojani ishin të përjashtuar për shqyrtimin e kërkesës së këtij të fundit për përjashtimin e kryetares.
Në mbledhje nuk u paraqitën anëtarët Arta Mandro, Zeqir Hoda dhe Erion Fejzulla. Të pranishëm në sallën e mbledhjeve ishin anëtarët Ledina Riza, Vatë Staka, Moisi Duda, Olger Eminaj dhe zëvendëskryetari, Erind Gërmenji. Anëtari Erind Mërkuri ishte i pranishëm online.
Anëtari Vatë Staka deklaroi disa herë se ishte e pakuptimtë përse disa anëtarë nuk vinin në mbledhje plenare.
Gërmenji konstatoi se nuk arrihej kuorumi dhe u vendos shtyrja e mbledhjes po të premten për në orën 12:00.
Edhe pas dy orësh, këshilli nuk arriti të formonte kuorumin prej shtatë anëtarësh. Zv.kryetari Gërmenji bëri me dije se anëtari Zeqir Hoda kishte informuar se ishte njohur me kërkesën për përjashtimin e tij të bërë nga anëtari Vatë Staka, por se i nevojitej më shumë kohë për ta shqyrtuar atë, si dhe kërkesën që ka bërë ai vetë për përjashtimin e Stojanit. Në të dy mbledhjet e të premtes, nuk u bë me dije ndonjë shkak i mungesës së dy anëtarëve të tjerë.
Për arsye të mosarritjes së kuorumit, u vendos që mbledhja të shtyhej sërish, për ditën e martë më 8 shtator, në orën 10:00.
Për pozicionin e Prokurorit të Përgjithshëm, me një mandat 7-vjeçar janë futur në garë prokurori i SPAK, Adnan Xholi; ish-Prokurorja e Përgjithshme e Përkohshme, Arta Marku e cila aktualisht e ushtron funksionin pranë Prokurorit së Apelit Tiranë; prokurorja pranë Eurojust, Fatjona Memçaj; prokurorja e Tiranës, Rovena Zoto; si dhe prokurori i Tiranës, Ylli Pjetërnikaj, i cili aktualisht është pedagog i brendshëm pranë Shkollës së Magjistraturës.
