Një shtetas rus, i dyshuar për vrasjen e tre personave në një poligon qitjeje në Danilovgrad, në Malin e Zi qendror, vrau veten të martën pasi hapi zjarr ndaj policisë kur u gjet pranë qytetit bregdetar të Herceg Novit, njoftuan autoritetet.
Viktimat, të vrara nga shtetasi rus të hënën, janë identifikuar si banorët e Podgoricës Nemanja Kapor, 20 vjeç, dhe Petar Globarevic, 24 vjeç, si dhe banori i Danilovgradit Momir Radonjic, 67 vjeç.
Policia e identifikoi të dyshuarin si shtetasin rus 30-vjeçar Mikhail Nikolaevich Shabunin.
Drejtori i Policisë, Lazar Scepanovic, tha të martën se efektivët e kishin lokalizuar Shabuninin në një zonë të pyllëzuar mbi lagjen Topla të qytetit bregdetar të Herceg Novit.
“Pasi i dyshuari u rrethua dhe u gjend në një situatë pa rrugëdalje, ai hapi zjarr në drejtim të oficerëve të policisë dhe më pas kreu vetëvrasje me armë zjarri”, tha Scepanovic.
Policia tha se Shabunini kishte vizituar poligonin e qitjes Ceska Zbrojevka në Danilovgrad në ditët para vrasjeve.
“Ai kreu qitje në poligon, hyri në ndërtesë dhe kreu vrasjet”, tha Scepanovic. “Pas kësaj, ai u largua me një nga automjetet e viktimave.”
Më vonë, policia gjeti automjetin që Shabunini dyshohet se përdori për t’u larguar nga vendi i krimit në Rogam, pranë Podgoricës. Autoritetet besojnë se Shabunini më pas udhëtoi me taksi nga Podgorica në drejtim të Herceg Novit.
Scepanovic e kishte përshkruar të dyshuarin si të rrezikshëm dhe kishte thënë se pas vrasjeve ai kishte marrë me vete një armë zjarri dhe municion.
Klubi i qitjes Ceska Zbrojevka i tha transmetuesit shtetëror RTCG se tre viktimat ishin punonjës të tij dhe se në momentin e ngjarjes ndodheshin në punë, pa armë dhe pa mundësi për t’u mbrojtur.
Policia fillimisht u bëri thirrje banorëve të qëndronin brenda banesave ndërsa i dyshuari ishte në arrati dhe paralajmëroi njerëzit të shmangnin kontaktin me persona të panjohur dhe të raportonin çdo sjellje të dyshimtë.
Autoritetet nuk kanë bërë të ditur një motiv të mundshëm dhe as nuk kanë dhënë detaje të tjera rreth rrethanave që çuan në vrasje.
“Oficerët e policisë po vijojnë veprimtarinë e tyre në bashkëpunim me Prokurorinë e Lartë të Shtetit në Podgoricë për të përcaktuar të gjitha rrethanat e incidentit, përfshirë shkakun dhe motivin e tij, si dhe për të sqaruar plotësisht të gjithë situatën”, thuhej në deklaratë.
Kryeministri Milojko Spajic shprehu ngushëllimet për familjet e viktimave. Ai tha se 1 dhe 2 shtatori do të shpallen ditë zie në Malin e Zi.
