Në një letër dërguar qeverisë shqiptare, kryetari i Këshillit të Dhomave të Avokatisë dhe Shoqatave të Juristëve të Evropës (CCBE), i cili përfaqëson organizata të 46 vendeve, shpreh shqetësimin e tij lidhur me kërcënimet publike për ndjekje penale dhe procedim disiplinor ndaj avokatit Gentian Sejrani, në lidhje me ushtrimin e detyrave të tij profesionale në mbrojtje të personave të ndaluar nga policia gjatë protestave anti-qeveritare të njohura si ‘Revolucioni i Flamingove’.
“CCBE u bën thirrje me respekt autoriteteve kompetente që të marrin të gjitha masat e nevojshme për të garantuar që avokati Gentian Serjani të mund të ushtrojë detyrat e tij profesionale pa frikësim apo ndërhyrje të papërshtatshme dhe të përmbahen nga çdo veprim penal, disiplinor apo administrativ që buron nga ushtrimi legjitim i këtyre detyrave” shkruan president i CCBE-së Roman Zavrsek, në letrën dërguar kryeministrit Edi Rama.
“CCBE rikujton se avokatët duhet të jenë në gjendje t’i ushtrojnë funksionet e tyre profesionale në mënyrë të pavarur dhe pa frikën e hakmarrjes, pengimit, frikësimit apo ngacmimit, me qëllim garantimin e pavarësisë dhe integritetit të administrimit të drejtësisë dhe mbrojtjen e shtetit të së drejtës,” shton Zavrsek.
Me 4 korrik, ministri i Brendshëm Besfort Lamallari, bëri thirrje për ndjeje penale dhe masa disiplinore ndaj Serjanit duke e akuzuar për ‘nxitje të urrejtjes”, pasi ky i fundit bëri publike pretendimet e një klienti për abuzim fizik gjatë qëndrimit në paraburgim policor.
Sejrani, avokat dhe drejtor ekzekutiv i organizatës Drejtësi Sociale, ka përfaqësuar dhjetëra protestues të arrestuar ose të ndaluar që nga fillimi i protestave anti-qeveritare dy muaj më parë.
Duke e ndarë letrën e CCBE-së në faqen e tij në Facebook, Serjani ishte kritik ndaj Dhomës Kombëtare Shqiptare të Avokatisë, e cila ndryshe nga partnerët evropianë, nuk ka reaguar ndaj deklaratave të ministrit Lamallari.
“Meqë Dhoma Kombëtare e Avokatisë Shqiptare ende nuk ka reaguar, reagoi me shpejt organizata evropiane që përfaqëson dhomat kombëtare dhe shoqatat e avokatëve në Evropë,” shkruan ai.
Në letrën drejtuar Ramës, kryetari i CCBE-së Roman Zavrsek thekson se organizata i kushton rëndësi të veçantë respektimit të të drejtave të njeriut dhe shtetit të së drejtës dhe ndjek me shqetësim të posaçëm situatën e avokatëve në rrezik në mbarë botën.
Ai tërheq vëmendjen e qeverisë shqiptare mbi “Parimet Themelore të Kombeve të Bashkuara mbi Rolin e Avokatëve”, ndërsa e rikujton se më 15 qershor, Shqipëria ka nënshkruar konventën e Këshillit të Evropës për Mbrojtjen e Profesionit të Avokatit dhe bën thirrje për ratifikimin e saj të shpejtë.
