Anëtarja e Kryesisë së Lëvizjes “Shqipëria Bëhet”, avokatja Greta Ambeli, ka reaguar lidhur me një rastin e arrestimit në Kuçovë.
Në një video publike, Ambeli i është drejtuar kryeministrit Edi Rama, duke e akuzuar qeverinë për standarde të dyfishta në zbatimin e ligjit.
“Edi Rama, këtu pas meje janë ato 7-8 kate pa leje që ti thua se i ke kaq merak. Por ne nuk pamë të arrestohej askush për këtë shkelje të ligjit, në mes të Tiranës, nën hundën tënde”, deklaroi Ambeli.
Avokatja Ambeli ka sjellë në vëmendje një rast të ndodhur në Kuçovë, ku, sipas saj, tre punonjës policie kanë ndërhyrë për të arrestuar një qytetar në një fshat, pasi ky i fundit po kryente punime në kasollen e bagëtive.
“Ndërkohë, në Kuçovë, tre policë si bandë shkuan te një prind në një fshat të largët dhe e arrestuan dhunshëm, vetëm pse po rregullonte kasollen e bagëtive”, u shpreh ajo, duke iu referuar edhe pamjeve ku, sipas saj, qytetari merret me forcë në prani të fëmijëve të tij të mitur.
Ambeli e ka cilësuar këtë situatë si shembull të “dy realiteteve” të qeverisjes, duke argumentuar se ligji zbatohet me forcë ndaj qytetarëve të zakonshëm, ndërsa ndaj personave me pushtet ekonomik dhe politik ka një tjetër standard.
“Këto janë dy realitetet e qeverisjes tënde, Edi Rama: një shtet që funksionon me forcë ndaj të varfrit, që arrestohet, dhunohet dhe poshtërohet kur përpiqet të mbijetojë me ndershmëri”, tha Ambeli.
Në përfundim, Ambeli i ka bërë thirrje kryeministrit Edi Rama të japë dorëheqjen dhe të hapë rrugën për një qeveri tranzitore.
“Edi Rama, jep dorëheqjen dhe hapi rrugën për një qeveri tranzitore që ta çojë vendin drejt zgjedhjeve të lira dhe të ndershme”, përfundoi ajo.
