Përplasja mes dy institucioneve më të rëndësishme të futbollit botëror, FIFA-s dhe UEFA-s, duket se po hyn në një fazë edhe më të ashpër, teksa përballja tashmë është zhvendosur në terrenin juridik.
Pas kritikave të vazhdueshme të UEFA-s ndaj FIFA-s dhe presidentit të saj, Gianni Infantino, këtë herë është institucioni ndërkombëtar i futbollit që ka reaguar ashpër. FIFA e akuzon UEFA-n se po zhvillon një fushatë për dëmtimin e imazhit të Infantinos, duke e lidhur atë me projektin e diskutueshëm për përfshirjen e kapitalit privat në aktivitetet komerciale të Kupës së Botës.
Në dokumentet e paraqitura në SHBA, FIFA kundërshton kërkesat e UEFA-s për sigurimin e dokumenteve dhe provave, duke pretenduar se procesi nuk ka një objekt të përcaktuar qartë dhe se pas tij fshihen motive kryesisht reputacionale.
Çështja lidhet me projektin “FIFA Forward Enterprise”, përmes të cilit ishte shqyrtuar mundësia që rreth 20% e aktiviteteve komerciale të FIFA-s t’u kalonte investitorëve privatë. Marrëveshja e mundshme bazohej në një vlerësim prej rreth 20 miliardë dollarësh, por projekti u tërhoq pas kundërshtimeve të shumta.
UEFA, ndërkohë, nuk ka hequr dorë nga hetimet. Institucioni europian ka kërkuar dokumentacion në disa juridiksione amerikane, me synimin që materialet e mbledhura të mund të përdoren në një proces të mundshëm penal në Zvicër.
Nga ana tjetër, FIFA mohon çdo shkelje dhe akuzon UEFA-n se po përpiqet të dëmtojë reputacionin e Infantinos përmes proceseve gjyqësore dhe presionit mediatik.
Deri tani, asnjë prej pretendimeve të ngritura nga palët nuk është vërtetuar përfundimisht. Megjithatë, përplasja mes FIFA-s dhe UEFA-s po merr përmasa gjithnjë e më të mëdha, duke u shndërruar nga një debat institucional në një betejë të hapur juridike dhe politike.
