Sulmuesi i Realit po e sheh një transferim në Serie A gjatë janarit si “tejet të mundshëm”

Futboll

Gazeta Express

04/09/2026 19:40

E ardhmja e Endrickut te Real Madridi mbetet e pasigurt edhe pse afati kalimtar i verës tashmë është mbyllur, ndërsa Roma është shfaqur si një destinacion i mundshëm për sulmuesin brazilian në janar.

20-vjeçari u rikthye këtë verë në “Bernabeu” pas një huazimi të suksesshëm gjashtëmujor tek Olympique Lyon, por ende nuk e ka të garantuar një rol të rëndësishëm në skuadrën e Jose Mourinhos.

Kishte pasur diskutime për një largim të tij gjatë verës, veçanërisht pas transferimit të Carlos Espit, por asgjë nuk u konkretizua.

Megjithatë, nëse koha e tij në fushë mbetet e kufizuar gjatë pjesës së parë të sezonit, një tjetër huazim mund të bëhet opsion.

Gazetari dhe komentatori italian Jacopo Aliprandi, i cili e ndjek nga afër Romën, ka zbuluar se Endricku ka diskutuar me njerëz të afërt me të mundësinë e transferimit te klubi nga Serie A.

“Endricku u ka thënë miqve të tij se transferimi te Roma në janar është një mundësi shumë reale”, tha Aliprandi për “Corriere dello Sport”.

Aktualisht nuk ka asnjë marrëveshje mes klubeve dhe çdo lëvizje e mundshme do të varet shumë nga situata e Endrick gjatë pjesës së parë të sezonit.

Braziliani ende pritet të luftojë për vendin e tij te Real Madridi, por një tjetër largim mund të merret në konsideratë nëse ai mendon se nuk po merr minutat e rregullta që i nevojiten për të vazhduar zhvillimin e tij.

Endricku është rikthyer në një skuadër të Real Madridit të mbushur me alternativa në repartin ofensiv.

Kylian Mbappe dhe Vinicius Jr. mbeten titullarë të padiskutueshëm në sulm, ndërsa Arda Guler dhe Jude Bellingham gjithashtu konsiderohen jashtëzakonisht të rëndësishëm në përbërjen e ekipit.

Duke i shtuar kësaj edhe praninë e Espit si alternativë për sulmin dhe konkurrencën nga lojtarë si Yan Diomande dhe Brahim Diaz në krahun e djathtë, Endricku përballet me një konkurrencë të fortë për minuta të rregullta.

Nga ana e tij, Mourinho e vlerëson shumë potencialin e talentit të ri. Edhe Reali vazhdon ta konsiderojë atë një investim të rëndësishëm për të ardhmen dhe nuk ka ndërmend të heqë dorë lehtësisht nga kartoni i tij.

Megjithatë, në moshën 20-vjeçare, braziliani ka nevojë për minuta të vazhdueshme për të vijuar zhvillimin dhe një qëndrim i gjatë në stol mund ta detyrojë klubin dhe lojtarin që ta rishikojnë situatën.

Kështu, nëse Roma do të bëjë një lëvizje në janar, zgjidhja më e mundshme fillimisht do të ishte një huazim, duke i mundësuar Endrickut të fitojë përvojë të rregullt në Serie A, pa u angazhuar Reali për një transferim të përhershëm.

Për momentin, prioriteti i Endrickut është ta bindë Mourinhon se e meriton një vend në skuadrën e Real Madridit.

Aktualisht duke u rikuperuar nga një problem muskulor, minutat që do të marrë gjatë javëve të ardhshme do të jenë vendimtare për të përcaktuar se çfarë do të ndodhë me të në janar./GazetaExpress/