Publikuar më 02.09.2026 nga Shek

Këtë të mërkurë ministrja e Shëndetësisë dhe Mirëqënies Sociale, Evis Sala, u dorëhoq pas afro një viti në këtë pozicion. Në mbledhjen e qeverisë, Sala njoftoi dorëheqjen për shkak të impenjmit të saj ndërkombëtar.

Ky zhvillim ka sjellë reagime në kampin e opozitës, me disa deputetë dhe figura aktive që kanë reaguar.

Jorida Tabaku akuzon qeverinë se dorëheqja e ministres së Shëndetësisë vjen në prag të krijimit të një agjencie të re që do të përqendrojë tenderat dhe menaxhimin e barnave. Tabaku e cilëson si një skemë që rrezikon konkurrencën dhe rritjen e kostove, duke përmendur tendera me vlerë rreth 150 miliardë lekë, ose 1.5 miliardë euro.

‘‘Ministrja e Shëndetësisë ka dhënë dorëheqjen pikërisht në momentin kur pritet të krijohet e të me agjenci e re, një super agjenci, një super kompani e cila do të menaxhojë të gjithë tenderat në fushën e shëndetësisë.

Kjo agjenci është shembulli më i mirë i sistemit, është shembulli më i mirë i monopolizimit, përqendrimit në pak duar, i shkatërrimit të konkurrencës, i rritjes së çmimeve, i dëmit që do të bëhet në kurriz të qytetarëve, si dhe sigurisht në favor të të përzgjedhurve të kryeministrit dhe të përzgjedhurve të qeverisë’’, shkruan mes të tjerash Tabaku.

Drejtuesi i departamentit të Shëndetësisë në PD, Ilir Alimehmeti përmes një statusi publik ka ngritur dyshime mbi arsyet e largimit të Evis Salës nga Ministria e Shëndetësisë. Sipas tij, burimet mediatike flasin për mosdakordësi me një projektligj që lidhet me koncesionet, tenderat dhe kontratat në shëndetësi. Alimehmeti i kërkon Salës të dalë publikisht dhe të sqarojë të vërtetën e largimit.

‘’Burimet mediatike dhe korridoret e Ministrisë së Shëndetësisë konvergojnë drejt mosdakordësisë së saj për te firmosur një projektligj që i dorëzon një dore të vetme të gjithë shëndetësinë me koncesionet, tenderat dhe kontratat e saj.

Nëse kjo është e vërteta e largimit të saj, ajo duhet të ngrihet në lartësinë e detyrës që kishte, të dalë me kokën lart dhe integritetin e ruajtur e ta denoncojë këtë tradhëti ndaj shëndetësisë që bën kryeministri.

Të gjithë do t’i themi “Bravo të qoftë, kaq mund të bëje në këtë sistem të kalbur”, thotë Alimehmeti.

Ai vijon më tej duke thënë se në një vit të plotë Sala nuk ka lënë gjurmë në sistemin shëndetësor të vendit.

‘’Fatkeqësisht në një vit të plotë diellor nuk arriti dot të lërë as gjurmën më të vogël të përmirësimit të sistemit shëndetësor, por vetëm fraza “do të presim të dhëna”, “do të presim deri në fund të vitit”, “nuk kam pasur nevojë për ilaçe dhe nuk e di që janë rritur çmimet”, e të tjera si këto! Të vaftë mbarë angazhimi ndërkombëtar, se për angazhimin kombëtar më mirë të mos flitet më’’, shkruan Alimehmeti.

Edhe nënkryetari i PD-së, Belind Këlliçi vijon në të njëjtën linjë. Ai akuzon qeverinë se po përgatit krijimin e një agjencie të re që do të centralizojë tenderimet, ilaçet dhe pajisjet shëndetësore.

Këlliçi thekson se në këtë skemë ka interesa të biznesmenit izraelit Sani Sanilevich, mik i kryeministrit Rama dhe i kërkon SPAK-ut të ndërhyjë për të hetuar projektin.

‘’Evis Sala u largua për t’i hapur rrugë dorëzimit të Shëndetësisë tek miku izraelit i Ramës. Siç e kemi paralajmëruar, projekti i Edi Ramës për krijimin e një agjensie që do marrë shendetësinë në dorë, i dha efektet e para. Largimi i Ministres Sala ka lidhje pikërisht me këtë aferë.

Projektligji që është aktualisht draft, pritet të kalojë me fillimin e sesionit parlamentar, dhe i hap rrugën një biznesi të madh me ilaçet, pajisjet shëndetësore e çdo operacioni logjistik e strategjik nga tenderimi, magazinimi e shpërndarja.

Praktikisht bëhet fjalë për krijimin e një Ministrie Shëndetësie paralele, por me pushtet absolut që sipas gjithë gjasave do të kontrollohet nga miku i ngushtë i Edi Ramës, izraeliti Sani Sanilevich, që është dhe konsull nderi i Shqipërisë, me firmë të vetë Ramës’’, shkruan Këlliçi.

Sipas tij, Sanilevich ka interes që të marrë nën kontroll të gjithë sistemin shëndetësor.

‘’Sanilevich dhe ortakë të tij në biznes, kanë interesa të gjëra që po i vënë në jetë në Shqipëri. Përveç resorteve, fokusi tani është në shëndetësi. Dhe jo vetëm ngritja e një spitali privat, por marrja nën kontroll e gjithë sektorit, me shoqërinë që kërkon të ngrejë Edi Rama’’, thotë në reagimin e tij nënkryetari i PD-së.