Administratori i kompanisë DAAM, Valter Begaj, i akuzuar nga SPAK për korrupsion aktiv, falsifikim dokumentesh dhe pastrim parash në bashkëpunim me ish-kreun e ARRSH, Evis Berberi kërkoi përmes avokatit të tij të mërkurën shpalljen e pavlefshme të provave të Prokurorisë.
Begaj ishte i pranishëm në seancë, kur në fillim të çeljes së saj, u njoh me vendimin e gjykatës për rrëzimin e kërkesës për të qëndruar jashtë kabinës së xhamtë gjatë seancave gjyqësore.
Në vijim, përfaqësuesi i tij ligjor, avokati Isuf Shehu kërkoi që të sillen në sallën e gjykimit të gjithë fashikujt hetimorë, me qëllim që të përcaktoheshin provat. Gjykata e rrëzoi këtë kërkesë me argumentin se mund të njihen me gjithë fashikujt e dosjes në ambjente të tjera të gjykatës, ndërsa në sallë do të paraqiten parashtimet.
Prokurori Dritan Prençi vërejti se janë ende në fazën e emërtimit të provave dhe se kjo kërkesë është shumë e hershme. Ai argumentoi se nëse provat e paraqitura nga prokuroria do të pranohen nga gjykata, ato do të debatohen secila gjatë gjykimit. Ai vërejti se mbrojtësi, me këtë kërkesë ishte futur në administrim e gjykatës.
Avokati Isuf Shehu paraqiti kërkesa për pavleshmërinë e një akti ekspertimi kontabël të prokurorisë dhe ekspertimet teknike kompjuterike të telefonave të Evis Berberit.
Shehu paraqiti gjerësisht një vendim të Gjykatës Kushtetuese për një rast tjetër, që sipas tij është i ngjashëm me atë të mënyrës së këqyrjes së telefonave të Berberit. Ai dhe vetë Begaj konstatuan se janë kryer këqyrje të të dhënave private, si dhe se nuk janë marrë vendime nga gjykata për ekspertimet e telefonave në vijimësi. Për këto arsye, Begaj kërkoi që këto prova që lidhen me të dhënat e nxjerra nga telefonat celularë të Berberit, të konsiderohen në pavlefshme dhe të papërdorshme në këtë gjykim.
Në kërkesën për provat, avokati Shehu renditi emrat e personave të shumtë, mes tyre inxhinierë dhe arkitektë të punësuar nga DAAM sh.p.k, si dhe të pandehurin Evis Berberi, për të cilët kërkoi që të thirren në cilësinë e dëshmitarit. Ai parashtroi se me dëshmitë e tyre do të provonin punët e kryera nga DAAM sh.p.k. për llogari të Net Group sh.p.k., duke kundërshtuar kështu pretendimet e SPAK për fatura fiktive.
“Ato fatura konsiderohen nga akuza si fiktive, por ka vetëm parregullsi”, tha avokati Shehu dhe shtoi se me këto prova do të mund të përllogariten punët që DAAM sh.p.k. ka bërë pa faturë për llogari të Net Group sh.p.k..
Prokurori Dirtan Prençi e cilësoi të pavend kërkesën për pavlefshmëri dhe papërdorshmëri të provave. Ai deklaroi se aktet e ekspertimeve janë kryer të gjitha gjatë hetimit paraprak, si dhe janë administruar në seancën paraprake.
Për aktete e ekspertimit tekniko-kompjuterik të celularëve të Berberit, ai shpjegoi se janë kryer si rrjedhojë e zbatimit të vendimit të gjykatës për kontrollin e tyre.
Gjykata pasi u tërhoq, konstatoi se kërkesat janë voluminoze dhe mori kohë deri më datë 17 korrik për shpalljen e vendimit lidhur me këto kërkime.
