Drejtuesi i Prokurorisë së Posaçme, Klodian Braho deklaroi të enjten gjatë një takimi me gazetarët, se kishin informacion për vendodhjen e të kërkuarit Ermal Beqiri në Francë prej të paktën dy javësh. I shpallur në kërkim ndërkombëtar prej 6 muajsh si një nga personazhet kyçe të aferës së AKSHI-t, Beqiri u arrestua dy ditë më parë në Francë, ndësa po flutonte me një avion të lehtë privat mbi një objekt të sigurisë së lartë.
Më vonë ju dorëzua autoriteteve të drejtësië franceze, për të vijuar me procedurat e ekstradimit.
Sipas prokurorit Braho, ndalimi i Beqirit nuk ka qenë një veprim i rastësishëm, pasi prej dy javësh SPAK kishte informacion për vendodhjet e tij në Francë dhe ishte në bashkëpunim me autoritetet francize për të hetuar edhe mbi veprimet e tij atje. Po ashtu, Braho deklaroi se u kishin kërkuar më herët autoriteteve franceze sekuestrimin e pasurive të Ermal Beqirit. “Nuk bëhet fjalë vetëm për avionë, por edhe për pasuri të tjera,” tha Braho.
Biznesmenët Ermal Beqiri dhe Ergys Agasi akuzohen se, së bashku me ish-drejtoreshën e AKSHI, Mirlinda Karçanaj dhe persona të tjerë, krijuan një skemë zhvatje të parave publike përmes dyfishimit të vlerës së tenderave, paracaktimit të fituesve dhe devijimin e miliona erove në llogaritë e një kompanie fiktive, ndërkohë që për “eleminimin” e rivalëve u përdorën anëtarë të krimit të organizuar. Po ashtu, akuzohen dhe për pastrim parash.
