Për një vit, shkollat publike të Nju Jorkut do të ndalojnë përdorimin e inteligjencës artificiale deri në klasën e nëntë. Vendim ky i njoftuar më 2 shtator nga kryebashkiaku Zohran Mamdani, i përshkruar si rregullimi më i rreptë i vendosur deri tani në Shtetet e Bashkuara.
Nxënësit e shkollave të mesme, ndërkaq, do të kenë akses dy herë në vit për të mësuar përdorimin e inteligjencës artificiale. Pra, ndalimi nuk është i përhershëm, por është në fuqi për një vit shkollor, në mënyrë që të hartohet një politikë e saktë për inteligjencën artificiale.
Vendimi i sistemit arsimor të Nju Jorkut, më i madhi në Shtetet e Bashkuara (600 mijë nxënës), vjen ndërsa shkollat publike të Los Anxhelosit po bllokojnë përkohësisht aksesin në platformat e inteligjencës artificiale në klasë për fëmijët e të gjitha moshave: një masë e ndërmarrë ndërsa synohet që gjatë vitit shkollor të hartohet një politikë përfundimtare.
Në Los Anxhelos, qershorin e kaluar, u vendos eliminimi i përdorimit të ekraneve dixhitale në klasë për fëmijët më të vegjël dhe bllokimi i aksesit në YouTube dhe rrjete të tjera sociale gjatë mësimeve. Edhe Nju Jorku do të rekomandojë kufizime, duke sugjeruar një maksimum prej gjysmë ore para ekraneve dixhitale për nxënësit nga klasa e tretë deri në të pestën dhe 45 minuta për nxënësit e ciklit të mesëm.
Ka reagime që kundërshtojnë këto masa, por ekziston një konsensus mjaft i gjerë për idenë se duhet kufizuar përdorimi i inteligjencës artificiale për nxënësit më të vegjël. Prindërit janë kryesisht në favor të vendosjes së kufizimeve. Ata janë ankuar më parë se të nxënit përmes ekraneve dhe i bazuar në inteligjencën artificiale po zëvendëson të nxënit përmes përvojës, ndërveprimeve sociale dhe të menduarit të pavarur.
Mësuesit janë të ndarë, pasi ekziston ideja se ndërveprimi mes mësuesit dhe nxënësit është thelbësor, por ka edhe shqetësime se një ndalim i përgjithshëm i inteligjencës artificiale mund të pengojë përdorimin e mjeteve të dobishme arsimore, veçanërisht për nxënësit që përfitojnë nga asistenca individuale.
Mbështetësit e përdorimit të inteligjencës artificiale si mjet arsimor, nga ana tjetër, argumentojnë se shkollat publike rrezikojnë të mbeten prapa realitetit. Nxënësit do të përballen me inteligjencën artificiale kudo jashtë mureve të shkollës dhe më vonë në universitet dhe në punë, ndaj ndalimi i saj gjatë viteve të formimit mund t’i lërë të papërgatitur.
Megjithatë përgjigjja e sistemit arsimor të Nju Jorkut është t’u mësohet ta përdorin atë kur nxënësit të jenë gati dhe të aftë të mendojnë në mënyrë kritike, në vend që t’u japim më të vegjëlve akses të pakufizuar.
Dhe më pas janë ata që kërkojnë një ndalim edhe më të rreptë: Shqetësimi për aksesin në të dhënat personale të fëmijëve dhe varësinë nga inteligjenca artificiale. Ata duan që moratoriumi njëvjeçar të kthehet në një ndalim të përhershëm.
Artikull i përshtatur nga Corriere della Sera
