Partia liberale austriake NEOS ka kërkuar nga Komisioni Evropian një reagim të ashpër ndaj Serbisë, duke propozuar pezullimin e negociatave të anëtarësimit dhe ndalimin e fondeve evropiane për Beogradin.
Kërkesa lidhet me reagimet e zyrtarëve dhe përfaqësuesve të autoriteteve serbe pas vdekjes së Ratko Mladiçit, ish-komandantit të forcave serbe të Bosnjës, i dënuar nga drejtësia ndërkombëtare për gjenocid, krime kundër njerëzimit dhe krime lufte.
Brandstetter: Është kaluar një kufi
Eurodeputeti austriak i NEOS, Helmut Brandstetter, e ka cilësuar qëndrimin e autoriteteve serbe si të papajtueshëm me vlerat e Bashkimit Evropian.
Sipas tij, nderimi i Mladiçit nga përfaqësues të një shteti kandidat për anëtarësim në BE përbën një kapërcim të një kufiri të rëndësishëm politik dhe moral.
“Ratko Mladiç u dënua për gjenocid dhe krime kundër njerëzimit. Kur përfaqësues të autoriteteve të një vendi kandidat për anëtarësim në BE glorifikojnë një person të tillë pas vdekjes së tij, është kaluar vija e kuqe”, deklaroi Brandstetter.
Eurodeputeti austriak argumentoi se një sjellje e tillë është fyese për viktimat e luftës dhe familjet e tyre, ndërsa bie ndesh me parimet themelore të Bashkimit Evropian.
Kërkesa për ndalimin e fondeve
Brandstetter i ka kërkuar Komisionit Evropian që masat ndaj Beogradit të mos kufizohen vetëm te procesi i integrimit.
Ai kërkon ndërprerjen e pagesave nga fondet evropiane deri në momentin kur autoritetet serbe të distancohen qartësisht nga glorifikimi i personave të dënuar për krime lufte.
“Derisa autoritetet në Beograd të refuzojnë pa mëdyshje glorifikimin e kriminelëve të dënuar të luftës, negociatat për anëtarësimin e Serbisë në BE duhet të pezullohen dhe të gjitha pagesat ndaj Serbisë duhet të ndalen”, u shpreh ai.
Në të njëjtën kohë, eurodeputeti ka kërkuar që Brukseli të mos ndërmarrë hapa të tjerë për integrimin e Serbisë në zonën Schengen.
Mladiç vdiq në Hagë, po vuante burgimin e përjetshëm
Ratko Mladiç, ish-komandant i Ushtrisë së Republika Srpska gjatë luftës në Bosnje dhe Hercegovinë, ndërroi jetë në Hagë, ndërsa vuante dënimin me burgim të përjetshëm.
Ai u shpall fajtor për gjenocid, krime kundër njerëzimit dhe krime lufte, përfshirë përgjegjësinë për masakrën e Srebrenicës.
Pikërisht për shkak të këtij të kaluar, reagimet publike në Serbi pas vdekjes së tij kanë shkaktuar reagime të forta në qarqet politike evropiane.
“Serbia e ka vendin në Evropë”
Pavarësisht kërkesës për masa ndaj Beogradit, Brandstetter theksoi se qëndrimi i tij nuk është kundër integrimit të Serbisë në Bashkimin Evropian.
“Serbia i përket Evropës dhe duhet të bëhet pjesë e BE-së. Por kjo nënkupton respektim të pakushtëzuar të të drejtave të njeriut”, deklaroi eurodeputeti.
Edhe Komisioni Evropian ka mbajtur më herët qëndrimin se glorifikimi i kriminelëve të luftës është në kundërshtim me vlerat themelore të Unionit dhe nuk duhet të ketë vend as në vendet anëtare dhe as në shtetet kandidate për anëtarësim.
