Një operacion i autoriteteve greke në ishullin e Rodosit ka çuar në arrestimin e një 45-vjeçari shqiptar, i dyshuar për përfshirje në trafik droge dhe pastrim parash.
Gjatë kontrolleve në ambientet e një kompanie pasurish të paluajtshme, ku shqiptari punonte, autoritetet sekuestruan rreth 950 mijë euro cash, për të cilat, sipas hetuesve, nuk u paraqit dokumentacion që justifikonte posedimin dhe ruajtjen e tyre.
Operacioni nisi pas një kontrolli rutinë në portin e Pireut, mëngjesin e 27 gushtit. Efektivët e njësive kundër drogës ndaluan një 62-vjeçar grek, i cili sapo kishte mbërritur me anije nga Rodos.
Me ndihmën e një qeni të trajnuar për zbulimin e lëndëve narkotike, policia kontrolloi një valixhe që 62-vjeçari kishte shkuar të merrte në zonën e bagazheve të pashoqëruara. Brenda saj u gjetën 35 gramë kokainë dhe 0.9 gramë kanabis, ndërsa greku u arrestua.
Hetimet e mëtejshme çuan autoritetet te një 45-vjeçar shqiptar, i dyshuar si personi që kishte dërguar lëndën narkotike nga Rodosi.
Pas identifikimit të tij, autoritetet greke zhvilluan një operacion në ishull, ku kontrolluan ambientet e kompanisë së pasurive të paluajtshme. Gjatë kontrollit u sekuestruan 949,658.38 euro cash, si dhe një numër pajisjesh POS, karta nga institucione të ndryshme financiare, telefona celularë, karta SIM, pajisje për ruajtjen e të dhënave dhe shënime me emra dhe shuma parash.
45-vjeçari shqiptar u lokalizua dhe u arrestua, ndërsa në posedim iu gjetën edhe 3,750 euro, të cilat u sekuestruan.
Autoritetet greke dyshojnë se kompania e pasurive të paluajtshme mund të jetë përdorur për pastrimin e parave të përfituara nga veprimtari kriminale.
Hetimi vijon për zbardhjen e plotë të çështjes dhe për veprat penale që lidhen me trafikun e drogës, pastrimin e parave dhe veprimtarinë e një organizate kriminale.
