Një 20-vjeçare me origjinë shqiptare është bërë pjesë e një konflikti të rëndë familjar në Rimini të Italisë, pasi vendosi të largohej nga banesa e prindërve dhe të niste bashkëjetesën me partnerin e saj italian.
Sipas raportimeve të mediave italiane, lidhja nuk është pranuar nga familja për shkak të diferencave fetare. Prindërit, 44 dhe 47 vjeç, me origjinë nga Maqedonia e Veriut, dyshohet se kanë ushtruar presion të vazhdueshëm ndaj vajzës, duke kërkuar që ajo t’i jepte fund marrëdhënies.
Pas largimit nga shtëpia, e reja dhe i dashuri i saj u përpoqën të mos bënin publike adresën ku kishin nisur të jetonin. Megjithatë, sipas hetimeve, familjarët nisën të kërkonin informacion për vendndodhjen e çiftit përmes të afërmve, miqve dhe personave të komunitetit, derisa arritën ta zbulonin.
Më pas, 20-vjeçarja pretendon se ka marrë një sërë mesazhesh kërcënuese nga prindërit. Në njërin prej tyre, sipas dosjes së hetimit, i thuhej se mund ta gjenin kudo që të shkonte, ndërsa në një tjetër paralajmërohej se nëse nuk kthehej në shtëpi, do të përballej me një “jetë ferr”.
Çifti iu drejtua Policisë së Riminit dhe denoncoi situatën. Por, sipas dëshmive të tyre, presioni nuk përfundoi me kaq.
Në një nga episodet e raportuara, prindërit i kanë dërguar vajzës një fotografi ku babai shfaqej pranë zonës ku ndodhej banesa e saj. Për të renë dhe partnerin, kjo ishte shenjë se familjarët kishin arritur të lokalizonin shtëpinë e tyre.
Ngjarja më e rëndë dyshohet se ka ndodhur në maj të këtij viti, kur prindërit shkuan në banesën e çiftit dhe hynë brenda. Sipas mediave italiane, situata u tensionua dhe dy të rinjtë u ndjenë të kërcënuar nga mundësia e një përplasjeje fizike.
Në këto kushte, ata u larguan në një dhomë tjetër të banesës, mbyllën derën dhe telefonuan policinë. Efektivët mbërritën në vendngjarje dhe ndërhynë për të shmangur përshkallëzimin e situatës.
Pas dëshmive të mbledhura dhe denoncimeve të bëra nga çifti, Prokuroria e Riminit ka nisur procedimin ndaj dy prindërve. Ata po hetohen në gjendje të lirë për akuzat e përndjekjes dhe kërcënimeve.
Hetimet vijojnë, ndërsa 20-vjeçarja dhe partneri i saj kanë kërkuar mbrojtjen e autoriteteve, duke pretenduar se janë përballur për muaj me presion dhe kërcënime për shkak të lidhjes së tyre.
