Detaje të reja kanë dalë në dritë lidhur me lëvizjet e 48-vjeçarit Altin Allmuça përpara se të vriste 45-vjeçaren, bashkatdhetaren e tij, në Nea Smyrni dhe më pas t’i jepte fund jetës.
Sipas informacioneve, përpara se të largohej nga shtëpia, 48-vjeçari i la bashkëshortes së tij 1 mijë euro, duke i thënë: “Mbaji që të kesh para”. Më pas ai shkoi në Nea Smyrni, ku vrau 45-vjeçaren dhe menjëherë pas krimit kreu vetëvrasje.
Bashkëshortja e 48-vjeçarit, e cila është thirrur për të dëshmuar, mësohet se u ka thënë autoriteteve se prej rreth 18 muajsh kishte vënë re një ndryshim të ndjeshëm në sjelljen e tij.
Sipas dëshmisë së saj, ai mungonte shpesh nga shtëpia dhe kishte net kur flinte diku tjetër. Gruaja ka deklaruar se nuk e dinte se ku qëndronte apo nëse kishte një marrëdhënie me një grua tjetër.
Sipas të njëjtave informacione, ajo u ka thënë gjithashtu policëve se kishte frikë prej tij.U ndava prej tij sepse ishte xheloz”
Ndërkohë, dëshmitë e personave të afërt me 45-vjeçaren pritet të hedhin më shumë dritë mbi marrëdhënien e saj me 48-vjeçarin dhe veçanërisht mbi atë që kishte ndodhur përpara krimit.
Sipas informacioneve, viktima i kishte treguar motrës së saj se kishte një marrëdhënie me një burrë, por kishte vendosur të ndahej prej tij për shkak të xhelozisë së tij.
45-vjeçarja mësohet se i kishte thënë motrës se burri vazhdonte të këmbëngulte dhe se ajo kishte frikë prej tij.
Natën e vrasjes, 45-vjeçarja ndodhej e vetme në banesë. Vajza e saj nuk ishte në Athinë, pasi kishte udhëtuar drejt Agrinios së bashku me xhaxhain e saj.
Kamerat regjistruan krimin
Autoritetet po hetojnë natyrën e marrëdhënies mes 48-vjeçarit dhe 45-vjeçares. Hetuesit po shqyrtojnë gjithashtu pajisjet elektronike të tij, me synimin për të gjetur komunikime apo të dhëna të tjera që mund të ndihmojnë në rindërtimin e ngjarjeve që i paraprinë krimit.
Një element i rëndësishëm për hetimin janë edhe pamjet e kamerave të sigurisë në zonë, të cilat kanë regjistruar ngjarjen.
Sipas të dhënave të deritanishme, 48-vjeçari shihet duke pritur 45-vjeçaren jashtë banesës së saj. Kur ajo hapi derën dhe doli, ai e qëlloi me armë. Më pas, 48-vjeçari e drejtoi revolen nga vetja dhe kreu vetëvrasje.
Sipas informacioneve, arma që përdori mbahej prej tij në mënyrë të paligjshme.
Autoritetet hetojnë edhe të kaluarën e tij në Shqipëri
Hetuesit po shqyrtojnë paralelisht edhe të kaluarën e 48-vjeçarit në Shqipëri.
Sipas informacioneve, ai kishte pasur probleme me autoritetet shqiptare në vitin 2016, kur ishte arrestuar në Tiranë nën akuzën për përdhunimin e bashkëshortes së tij.
