Fotografi të hershme, letra të shkruara me dorë, partitura muzikore dhe kujtime nga fëmijëria e një prej violonçelisteve më të njohura të shekullit XX janë shitur në ankand për afro 52 mijë paund.

Koleksioni prej 137 sendesh të Jacqueline du Pré, i nxjerrë në shitje nga motra e saj, Hilary Finzi, përfshinte objekte që dokumentojnë vitet e para të jetës dhe formimit artistik të muzikantes britanike.

Ndër sendet më të veçanta ishte një fotografi e Du Pré duke luajtur violonçelon e saj të parë, e shitur për 1,100 paund, ndërsa një koleksion melodish të kompozuara nga nëna e saj arriti 4,000 paund. Certifikata e lindjes së artistes u shit për 1,000 paund, ndërsa arushi i saj i fëmijërisë, Sebastian, për 620 paund.

Përmes këtyre objekteve, ankandi solli në vëmendje jo vetëm një emër të madh të muzikës klasike, por edhe gjurmët intime të një fëmijërie që do të shndërrohej në një prej karrierave më të jashtëzakonshme të interpretimit të violonçelit.

Jacqueline du Pré dha koncertin e saj të parë në moshën shtatëvjeçare dhe u bë një nga instrumentistet më të vlerësuara të shekullit XX. Ajo vdiq në vitin 1987, në moshën 42-vjeçare.

Një ankand i dytë do të zhvillohet në dhjetor, me sende që lidhen me periudhën e saj të mëvonshme artistike dhe karrierën ndërkombëtare./KultPlus.com