Jane Austen rikthehet në qendër të leximit të Vogue Book Club, me romanin “Sense and Sensibility”, një vepër që prej më shumë se dy shekujsh vazhdon të jetojë përmes dashurisë, familjes dhe përplasjes mes arsyes dhe ndjenjës.

Vogue Book Club ka shpallur përzgjedhjen e radhës: “Sense and Sensibility”, romani debutues i Jane Austen, botuar për herë të parë më 1811.

Historia ndjek familjen Dashwood dhe veçanërisht dy motrat e mëdha, Elinor dhe Marianne, dy karaktere që përfaqësojnë dy mënyra të ndryshme për ta përjetuar dashurinë dhe jetën. Elinor është e matur dhe racionale, ndërsa Marianne udhëhiqet më shumë nga emocionet dhe pasioni.

Përmes marrëdhënieve të tyre, Austen ndërton një vështrim të mprehtë mbi dashurinë, martesën, pritshmëritë shoqërore dhe pozitën e gruas, duke i dhënë romanit një aktualitet që ka kaluar përtej kohës së tij.

“Sense and Sensibility” është përshtatur disa herë për ekran, ndërsa një nga versionet më të njohura mbetet filmi i vitit 1995, me regji të Ang Lee dhe skenar të Emma Thompson, me një kast ku përfshiheshin Kate Winslet, Alan Rickman dhe Hugh Grant.

Tashmë romani po rikthehet edhe një herë në vëmendje përmes një përshtatjeje të re filmike nga Georgia Oakley, me Daisy Edgar-Jones dhe Esmé Creed-Miles në rolet kryesore.

Leximi i organizuar nga Vogue Book Club do të zhvillohet gjatë disa javëve, duke nisur më 7 shtator me kapitujt e parë dhe duke vijuar deri më 12 tetor, kur lexuesit do të arrijnë në fund të romanit.

Kështu, ndërsa një tjetër version i historisë së Austen-it përgatitet të takohet me publikun në kinema, lexuesit ftohen të rikthehen te origjinali, te faqet ku arsyeja dhe ndjenja përplasen, dashuria vihet në provë dhe Jane Austen dëshmon edhe një herë se disa histori nuk plaken kurrë./KultPlus.com