Tashmë Tirana, kryeqyteti i Shqipërisë, po administrohet drejtpërdrejt nga kryebashkiaku i saj në paraburgim, Erion Veliaj. Me shumë mundësi, jemi përpara të precedenti që duhet hulmtuar pasi mund të marrë edhe çmimin e rekordeve “Guinness”. Para disa ditëve, Veliaj i hoqi delegimin si kryetare të detyrë Anuela Ristanit. Ndërkohë, sekretari i përgjithshëm është dorëhequr për tu zëvendësuar nga një ish pas vendimit të gjykatave, ndërsa të njëjtin fat ka patur edhe shefja e kabinetit të kryetarit të bashkisë Tiranë. Më interesantja, Veliaj ka bërë të ditur përmes avokatit të tij që nuk do të delegojë më kompetencat.
Zgjedhjet vendore me gjasë do të zhvillohen në të dielën e fundit të prillit apo të parën të majit të ardhshëm. Deri atëherë, kryeqyteti i Shqipërisë do të qeveriset nga kryebashkiaku në paraburgim. Situata nuk është aspak normale në fakt. Ata që e njohin nga afër funksionin e një kryebashkiaku e dinë se roli i tij në përditshmërinë e institucionit, rutinën e punëve e projekteve, është i pazëvendësueshëm. Prandaj ligjvënësi ka dhënë mundësinë e delegimit të kompetencave, kur kryebashkiaku e ka të pamundur ti ushtrojë ato. Në raste të ngjashme, zgjidhja kanë qenë zgjedhjet e parakohëshme, të cilët këtë herë i ka bërë të pamundura vendimi i Gjykatës Kushtetuese: Erion Veliaj vazhdon të jetë kryetari i bashkisë Tiranë!
Me Erion Veliajn është krijuar një precedent në qeverisjen vendore në Shqipëri. Deri në vendimin e formës së prerë të fajësisë, nga gjykatat e nivelit të dytë, çdo kryebashkiak është i plotfuqishëm në pozicionin e tij, mund delegojë dhe mos të delegojë kompetencat tek një prej zëvendësve të tij. Nga 10 shkurt 2025, rreth mesdite, kur Erion Veliajt iu vunë prangat, kanë kaluar më shumë se një vit e disa muaj. Ndërkohë, reforma administrative- territoriale është në finish dhe me gjasë, duhet të preket edhe ligji organik “Për vetëqeverisjen vendore”, 139/2015 por askush nuk kujtohet të artikulojë apo të propozojë zgjidhje ligjore për situata të ngjashme në të ardhmen me atë aktuale në bashkinë e Tiranës. Që do të thojë se “litari i Nasradinit” do të vazhdojë të ngelet jashtë akoma.
Të gjithë kanë kohë të diskutojnë dhe të hamendësojnë se “Veliaj po i jep goditje Ramës” me mosdelegimin e kompetencave të postit të kryetarit, duke e parë vetëm në kuadër të luftës politike. Ndërkohë, për punët e shumta e të përditshme të një bashkie me mbi 1 milion banorë, nga mbetjet urbane deri tek uji i pijshëm, askush nuk kujtohet. Askush “nuk e vë ujin në zjarr” nëse po ofrohen sherbimet e tjera në cilësi e sasi për banorët e kësaj bashkie, nëse po ekzekutohen në kohë e me cilësi projektet e shumta. E sigurisht, ata që i vuajnë janë qytetarët, jo politikanët apo analistët e banaqeve televizive apo banaqeve në rrjetet sociale.
Me shumë mundësi, Erion Veliaj do të vazhdojë të drejtojë bashkinë e Tiranës deri pas zgjedhjeve të vitit tjetër, duke ditur se si vepron drejtësia në këtë vend, me hapin e breshkës, sidomos kur në mes janë politikanë, të rëndësishëm madje. Ligjërisht madje, ai mund të rikandidohet përsa kohë nuk ka një vendim të formës së prerë fajësie për të. Teorikisht, edhe mund të fitojë pavarësisht se mund të jetë në paraburgim apo edhe “arrest shtëpie”. Atëherë precedenti do të ishte dyfish i rëndë, sidomos nësë një ditë të bukur, mund të dalë edhe i pafajshëm. Përveç rrogës që e merr rregullisht edhe pse nuk paraqitet në punë, mund të marrë edhe dëmshpërblim për burgun e padrejtë. Sepse precedentë të tillë pa patur dhe do të ketë. /Nga Sokol N. SOKOLI/
