Lidhja Demokratike e Kosovës – Nëndega në Nordrhein-Westfalen të Gjermanisë, ndër prioritetet e saj të veçanta ka nderimin dhe vlerësimin e personaliteteve intelektuale e atdhetare, të cilët, veçanërisht në periudhat më të vështira të historisë sonë, u angazhuan me përkushtim për çështjen e Kosovës dhe për çështjen kombëtare në përgjithësi.
Në mesin e këtyre figurave të ndritura, Nëndega e LDK-së në Nordrhein-Westfalen radhiti edhe Prof. Sejdi Rushit Kocën, ish-profesorin dhe kryetarin e Komunës së Skenderajt në disa mandate, një personalitet i cili me veprimtarinë e tij politike, arsimore dhe kombëtare la gjurmë të rëndësishme në jetën publike të Kosovës.
Në periudhat më të vështira nëpër të cilat kaloi Kosova, Prof. Sejdi Rushit Koca nuk u tërhoq dhe nuk u zmbraps nga angazhimi i tij. Përkundrazi, ai vuri në shërbim të çështjes së Kosovës dijen, autoritetin, përvojën dhe gjithë energjinë e tij, duke kontribuar në përpjekjet për liri, pavarësi dhe demokraci.
Përkushtimi i tij ndaj Kosovës dhe idealit të shtetit të pavarur ishte i palëkundur. Ai i qëndroi besnik bindjes se liria dhe pavarësia e Kosovës ishin aspirata të drejta dhe të domosdoshme të popullit shqiptar të Kosovës.
Prof. Sejdi Rushit Koca ishte gjithashtu një nga bashkëpunëtorët e afërt dhe besnikë të Presidentit historik të Kosovës, Dr. Ibrahim Rugova, duke qenë pjesë e atij brezi intelektualësh dhe veprimtarësh që, në rrethana jashtëzakonisht të vështira, kontribuuan në artikulimin dhe ndërkombëtarizimin e çështjes së Kosovës.
Veprimtaria e tij politike dhe kombëtare, e zhvilluar me përkushtim e përgjegjësi, përbën një pjesë të rëndësishme të historisë së angazhimit qytetar e politik për Kosovën. Kontributi i personaliteteve të tilla meriton të ruhet në kujtesën kolektive dhe t’u përcillet edhe brezave të ardhshëm.
Duke e vlerësuar lart veprimtarinë dhe kontributin e Prof. Sejdi Rushit Kocës për Kosovën dhe çështjen kombëtare, Kryesia e Nëndegës së LDK-së në Nordrhein-Westfalen, në bashkëpunim me Kryesinë Qendrore, vendosi t’i ndajë atij Mirënjohje Post Mortem, me motivacionin: “Për kontributin e dhënë për Liri, Pavarësi dhe Demokraci.”
Mirënjohja iu dorëzua djalit të tij, z. Ilir S. Koca, i shoqëruar nga motra e tij, znj. Shukrije S. Koca, nga Kryetari i Nëndegës së LDK-së në Nordrhein-Westfalen, z. Jakup Gërguri, dhe Nënkryetari i Kryesisë Qendrore, z. Anton Quni.
Në këtë ceremoni përkujtimore, para të pranishmëve, u mbajt edhe një fjalë rasti kushtuar jetës, veprimtarisë dhe kontributit të Prof. Sejdi Rushit Kocës, nga autori i këtij shkrimi.
Prof. Sejdi Rushit Koca tashmë nuk është në mesin tonë, por vepra, angazhimi dhe kontributi i tij mbeten pjesë e kujtesës sonë.
Një jetë e përkushtuar. Një ideal i palëkundur. Një kontribut për Kosovën që meriton të kujtohet dhe të nderohet.
Lavdi dhe respekt për veprën e Prof. Sejdi Rushit Kocës.
Hilm N GASHI- Gjermani
