Një nismë e re për shëndetin seksual të të rinjve ka nisur në Alto Adige të Italisë. Që prej 1 shtatorit, të rinjtë nga 14 deri në 25 vjeç që jetojnë në këtë zonë mund të përfitojnë falas disa nga metodat kryesore kontraceptive.

Programi përfshin pilulën kontraceptive, prezervativët, unazën vaginale, patch-in hormonal, implantin nënlëkuror dhe spiralet. Për pilulën, patch-in dhe unazën kërkohet recetë mjekësore, ndërsa metodat afatgjata do të ofrohen nëpërmjet strukturave shëndetësore.

Megjithatë, projekti nuk synon vetëm heqjen e kostos së kontraceptivëve. Të rinjve do t’u ofrohet edhe këshillim dhe informacion mbi shëndetin seksual dhe riprodhues, me synimin që të kenë më shumë njohuri për mbrojtjen nga shtatzënitë e padëshiruara dhe infeksionet seksualisht të transmetueshme.

Nisma vjen në një kohë kur të dhënat në provincën e Bolzanos kanë ngritur shqetësime. Gjatë vitit 2025 u regjistruan 595 ndërprerje vullnetare të shtatzënisë, një rritje prej 13,3% krahasuar me një vit më parë. Pothuajse gjysma e rasteve u përkisnin grave të moshës 18-29 vjeç.

Të dhënat mbi sjelljen seksuale të të rinjve tregojnë gjithashtu mangësi të konsiderueshme në informacion. Një pjesë e madhe nuk e dinë se prezervativi, përveç parandalimit të shtatzënisë, ndihmon edhe në uljen e rrezikut të transmetimit të shumë infeksioneve seksualisht të transmetueshme.

Shumë prej të rinjve i kërkojnë informacionet për seksin dhe kontracepsionin në internet dhe pothuajse gjysma deklarojnë se nuk flasin me prindërit për këto tema. Në të njëjtën kohë, shumica shprehin dëshirën për të marrë më shumë informacion dhe mbështesin edukimin seksual dhe emocional në shkolla.

Eksperimenti në Alto Adige synon pikërisht kombinimin e këtyre dy elementeve: akses më të lehtë te kontracepsioni dhe më shumë edukim për përdorimin e tij të përgjegjshëm.