Përballet me 5 akuza

Policia ka zbardhur detaje të reja nga hetimi për dhunimin e 26-vjeçarit Eduart Kuçi, ngjarje për të cilën është arrestuar Jozefin Marku, ndërsa një tjetër person është ndaluar dhe dy të tjerë janë shpallur në kërkim.

Sipas autoriteteve, 30-vjeçari Jozefin Marku u lokalizua në banesën e Kristjan Nikollit, ku ishte fshehur në tualet në përpjekje për t’iu shmangur policisë. Edhe Nikolli, 31 vjeç, përfundoi në pranga, ndërsa Anton Huli, 48 vjeç, dhe një tjetër person me inicialet K. V., 27 vjeç, janë shpallur në kërkim.

Hetimet janë zhvilluar nga strukturat e Drejtorisë Vendore të Policisë Tiranë, në bashkëpunim me efektivët e Drejtorisë Vendore të Policisë Lezhë. Veprimet hetimore kanë synuar zbardhjen e plotë të rrethanave të ngjarjes dhe identifikimin e të gjithë personave që dyshohet se kanë marrë pjesë.

Pesë akuza ndaj Jozefin Markut

Sipas Policisë, Jozefin Marku po hetohet për pesë vepra penale: “Heqja e paligjshme e lirisë”, “Plagosja e lehtë me dashje”, “Kanosja”, “Mbajtja pa të drejtë e uniformës” dhe “Ndërhyrja e padrejtë në jetën private”.

Ndërkohë, Kristjan Nikolli, i cili dyshohet se ka drejtuar automjetin tip “Land Rover” të përdorur gjatë ngjarjes, përballet me një numër më të madh akuzash.

Përveç veprave penale që lidhen me ngjarjen, ndaj tij rëndojnë edhe dyshimet për “Përkrahja e autorit të krimit” dhe “Mbajtja pa leje dhe prodhimi i armëve, bombave ose minave dhe i municionit”.

Sekuestrohet Land Rover-i dhe municion

Gjatë kontrollit të banesës së Kristjan Nikollit, efektivët kanë gjetur dhe sekuestruar një sasi municioni.

Në cilësinë e provës materiale është sekuestruar gjithashtu automjeti tip “Land Rover”, për të cilin hetuesit dyshojnë se është përdorur gjatë dhunimit të 26-vjeçarit.

Kontrollet janë shtrirë edhe në banesa të tjera në kuadër të hetimit, me qëllim mbledhjen e provave dhe dokumentimin e plotë të rrethanave të ngjarjes.

Dyshohet se e dhunuan pas një konflikti

Nga të dhënat e deritanishme të hetimit, Jozefin Marku dhe personat e tjerë të përfshirë dyshohet se kanë sulmuar dhe dhunuar Eduart Kuçin.

Sipas versionit të bërë publik nga Policia, motivi i pretenduar lidhet me një konflikt verbal, pasi 26-vjeçari dyshohet se kishte fyer një prej personave të përfshirë.

Autoritetet po vijojnë hetimet për të përcaktuar rolin konkret të secilit prej personave të dyshuar dhe për të identifikuar persona të tjerë që mund të kenë marrë pjesë në ngjarje.

Ndërkohë, vijon puna për lokalizimin dhe arrestimin e Anton Hulis dhe K. V., të shpallur në kërkim.

Në përfundim të veprimeve hetimore, materialet procedurale i janë referuar Prokurorisë për veprime të mëtejshme.