Apple ka prezantuar dy procesorë të rinj, M5 Ultra dhe M6, të krijuar për të fuqizuar gjeneratat e reja të Mac Mini dhe Mac Studio, me një fokus të fortë te inteligjenca artificiale dhe përpunimi direkt në pajisje. Çmimi për Mac Mini të gjeneratës së re do të nisë nga $899, ndërsa dërgesat pritet të fillojnë pas 22 shtatorit.
M5 Ultra cilësohet nga Apple si “çipi më i fuqishëm i krijuar nga kompania“. Ai bashkon dy çipe M5 Max me arkitekturë quad-die dhe ofron deri në 36 bërthama CPU, 80 bërthama GPU dhe 1.2 TB/s bandwidth memorieje të unifikuar. Kjo e fundit është 50% më e lartë se te M3 Ultra, duke e bërë çipin veçanërisht të përshtatshëm për renderime 3D, efekte vizuale dhe modele të avancuara AI.
Në anën tjetër, M6 synon një audiencë më të gjerë. I ndërtuar me procesin 2 nm, ai sjell një CPU me 12 bërthama, dy bërthama shtesë CPU dhe GPU, si dhe një Neural Engine Dual me 16 bërthama. Apple thotë se M6 ofron deri në 30% më shumë fuqi llogaritëse GPU për AI krahasuar me M5, duke përshpejtuar përpunimin e modeleve gjuhësore direkt në Mac.
Apple po e pozicionon përpunimin lokal si një avantazh të rëndësishëm për zhvilluesit, të cilët mund të trajnojnë dhe përshtatin modele AI pa i dërguar të dhënat në cloud.
Ndërkohë, kompania ende mbetet pas rivalëve në modelet e saj gjenerative, ndërsa Siri i ri mbështetet te Gemini i Google. Megjithatë, përpunimi lokal mund t’i japë Apple një avantazh në privatësi dhe siguri.
