Retë janë një nga pengesat kryesore për prodhimin e energjisë diellore, por një startup i mbështetur nga Y Combinator po kërkon të shfrytëzojë dronë autonomë që fluturojnë brenda reve për t’i shpërndarë ato duke lejuar rrezet e diellit të shkojnë drejt paneleve.
Meteoric Technologies, e themeluar nga dy inxhinierë të Universitetit të Cambridge, planifikon të përdorë dhjetëra apo qindra dronë elektrikë në lartësi rreth 1 deri në 5 kilometra mbi fermat diellore. Sipas kompanisë, dronët do të ndërhyjnë te pikat e ujit që formojnë retë, duke ulur reflektimin e tyre pa përdorur kimikate.
CEO Mete Karslioglu pretendon se retë e ulëta dhe të mesme mund të reduktojnë rrezet e diellit me 73–82%, ndërsa modeli i kompanisë sugjeron se teknologjia mund të rrisë prodhimin vjetor të fermave ekzistuese me 10–30%.
Megjithatë, këto shifra ende nuk janë provuar në kushte reale. Meteoric thotë se një prototip arriti të shpërndajë me 13% një re artificiale në laborator, por nuk ka publikuar detaje të mjaftueshme për testet apo vlerësim shkencor të pavarur.
Ndërhyrja në re nuk është koncept i ri. Teknikat aktuale përdorin materiale si akulli i thatë, propani të lëngshëm, kripëra higroskopike ose përzierje mekanike të ajrit, por aplikimi në shkallë të gjerë është i kushtueshëm.
Meteoric pretendon se dronët do të kushtojnë vetëm 30–60 dollarë në orë, krahasuar me mbi 2,000 dollarë për avionët.
Ambicia për të përdorur të njëjtën teknologji për dobësimin e uraganeve është shumë më kontroverse. Organizata Botërore Meteorologjike thekson se nuk ka prova të pranuara gjerësisht se ciklonet tropikale mund të modifikohen.
Sfida e radhës për startup-in është e thjeshtë: të tregojë se teknologjia funksionon edhe jashtë laboratorit, mbi një re të vërtetë.
