Lufta për dominimin e tregut të streaming-ut po zhvendoset edhe te krijuesit e përmbajtjes, me YouTube që raportohet se po ofron miliona dollarë për disa prej emrave më të mëdhenj të platformës, në këmbim të një kushti të qartë: videot e tyre të mos publikohen në Netflix apo platforma të tjera rivale.
Sipas burimeve të cituara nga Bloomberg dhe Business Insider, marrëveshjet do t’u kërkonin krijuesve të mbanin përmbajtjen ekskluzive në YouTube për një periudhë të caktuar, ende të panjohur. Pagesat do të realizoheshin përmes financimit të drejtpërdrejtë të programeve me buxhet të madh dhe një përqindjeje nga marrëveshjet me marka.
Ende nuk është firmosur asnjë kontratë, por negociatat me disa prej krijuesve më të njohur thuhet se janë në fazë të avancuar. Mes emrave të përfshirë janë Alan Chikin Chow dhe Nick DiGiovanni, ndërsa YouTube po synon edhe dhjetëra të tjerë, përfshirë Sean Evans, prezantuesin e “Hot Ones”.
Burimet pretendojnë se YouTube po përdor edhe presion indirekt. Krijuesit që refuzojnë ofertën dhe publikojnë njëkohësisht në Netflix mund të përjashtohen nga fushatat e marketingut dhe eventet promocionale, ndërsa YouTube mund të mos ndajë me ta të ardhurat nga disa fushata me marka.
Lëvizja shihet si kundërpërgjigje ndaj interesit në rritje të Netflix për yjet e YouTube. Megjithatë, shumë krijues e kanë refuzuar tashmë Netflix-in, pasi platforma kërkon dorëzimin e videove disa ditë përpara publikimit dhe, në disa raste, kufizimin e sponsorizimeve.
