Range Rover ka prezantuar automjetin e tij të parë tërësisht elektrik, duke shënuar një kthesë të rëndësishme për markën britanike dhe pronarin e saj, Jaguar Land Rover (JLR). Modeli mbërrin rreth një vit me vonesë nga plani fillestar, por synon të ofrojë një alternativë më miqësore me mjedisin për fansat e SUV-ve luksoze.
Me një çmim fillestar prej €180,000, modeli do të prodhohet në Solihull, aty ku Range Rover ka prodhuar automjetet e tij që prej vitit 1970. Makina mund të përshpejtojë nga 0 në 100 km/h për vetëm 4.3 sekonda, ndërsa JLR e përshkruan atë si fillimin e një “epokë të re” për rafinimin dhe aftësitë e Range Rover. Autonomia e makinës pritet të jetë rreth 600 km sipas ciklit WLTP.
Përpara hyrjes në prodhim, automjeti është testuar në një distancë ekuivalente me 38 udhëtime rreth botës, më shumë se çdo Range Rover tjetër. Kompania ka trajnuar gjithashtu 10,500 punonjës të përfshirë në projekt.
Megjithatë, përmasat gjigante të SUV-it ngrenë pikëpyetje edhe për ndikimin e tij në sigurinë rrugore, pasi automjetet e kësaj kategorie lidhen me rrezik më të lartë për këmbësorët në aksidente.
Range Rover ofron gjithashtu personalizim ekstrem, me një gamë pothuajse të pakufizuar ngjyrash, materialesh dhe kombinimesh të personalizuara.
