Përplasja për tokën në Palasë mes Luan Muçës dhe Vasil Bedinajt, ndërhyn Rama: Tokën do ta bëjmë ullishte!

Kryeministri Edi Rama ka reaguar pas përplasjes së ndodhur një ditë më parë mes biznesmenëve Luan Muça dhe Vasil Bedinaj.

Përmes një videoje në rrjetet sociale, Rama e cilësoi konfliktin “banal dhe brutal”, ndërsa njoftoi se qeveria do të shpronësojë zonën në Palasë ku parashikohej ndërtimi i një resorti.

Sipas kryeministrit, territori do të kthehet në ullishte, duke i dhënë fund projektit të planifikuar për zhvillim turistik.

Rama tha se vendimi është marrë pas analizimit edhe të hartës pronësore të zonës, ndërsa paralajmëroi se sjellje të tilla nuk do të tolerohen nga subjektet që zhvillojnë apo menaxhojnë asete turistike.

Ai theksoi se investitorët dhe operatorët duhet të sillen si “ambasadorë të turizmit shqiptar”, pasi zhvillimi turistik, sipas tij, përbën një mision kombëtar.

“Banalitetet dhe brutaliteti i çdo lloj natyre duhet të marrin përgjigjet që kërkon rëndësia shoqërore e një misioni të tillë kombëtar”, deklaroi Rama./ skyweb.al