SHBA paralajmëron sanksione të reja ndaj Iranit çdo javë

Administrata amerikane pritet të intensifikojë trysninë ekonomike ndaj Iranit përmes masave të reja ndëshkuese, të cilat mund të shpallen në baza javore.

Sekretari amerikan i Thesarit, Scott Bessent, tha se Uashingtoni do të marrë në shënjestër institucionet dhe kompanitë që ruajnë marrëdhënie financiare me Iranin. “Do të shihni shumë më tepër nga kjo çdo javë”, deklaroi ai në një intervistë për Reuters, përpara mbledhjes së ministrave të Financave të G20.

Paralajmërimi u bë pasi Shtetet e Bashkuara vendosën sanksione ndaj degëve të Banque Misr në Emiratet e Bashkuara Arabe, të cilat dyshohen për lidhje financiare me Iranin.

Bessent sqaroi se ndëshkimet mund të arrijnë deri në përjashtimin e plotë të disa institucioneve nga sistemi financiar që funksionon mbi dollarin amerikan.

Ai bëri të ditur se SHBA-ja do t’u kërkojë ministrave të Financave dhe bankierëve qendrorë të G20 të shkëpusin marrëdhëniet ekonomike me Iranin.

Nëse nuk veprojnë në këtë mënyrë, institucionet mund të përballen me sanksione dytësore. “Jeni ose me ne, ose me iranianët”, u shpreh Bessent, duke përcjellë qartë pozicionin e administratës amerikane.

Sipas sekretarit të Thesarit, synimi i këtyre masave është bllokimi i përdorimit të sistemit financiar ndërkombëtar për financimin e regjimit iranian. Ai hodhi poshtë edhe pretendimet se sanksionet e SHBA-së nuk do të kenë efekt pa u vendosur masa ndaj kompanive kineze që blejnë naftë nga Irani. Bessent tha se pjesa më e madhe e këtyre blerjeve është kufizuar tashmë përmes masave amerikane kundër porteve iraniane.

Ai shtoi se po pakësohet edhe nafta iraniane e grumbulluar në cisterna. “Problemi është zgjidhur”, deklaroi Bessent, duke sinjalizuar bindjen e Uashingtonit se presioni ekonomik po jep rezultat.

Me njoftimin për masa ndëshkuese të reja çdo javë, Shtetet e Bashkuara synojnë të shtojnë koston ekonomike për Iranin, si dhe për institucionet ndërkombëtare që vijojnë bashkëpunimin me të.