Mesazhi “Freedom for the Liberators” pritet të shfaqet më 7 shtator në Times Square të New Yorkut, në kuadër të aktiviteteve mbështetëse të diasporës shqiptare në prag të shpalljes së verdiktit në Hagë.
Veprimtari i diasporës shqiptare në SHBA, Shpend Gjocaj, ka njoftuar se grafika me mesazhin “Freedom for the Liberators” do të transmetohet gjatë ditës në ekranet e Times Square, për 15 deri në 30 sekonda në çdo orë.
Gjocaj ka publikuar në Facebook edhe konfirmimin nga “Welcome to Times Square” për transmetimin e materialit.
Aktiviteti në New York është pjesë e një serie organizimesh të paralajmëruara në Kosovë dhe jashtë saj, në prag të leximit të vendimit në Hagë.
Në Kosovë, aktiviteti kryesor do të jetë “Marshi për Liri”, i planifikuar për 12 shtator, në orën 14:00, me nisje nga sheshi “Skënderbeu” në Prishtinë.
Platforma “Liria ka Emër” ka nisur nismën mbarëkombëtare “Kosova po pret”, përmes së cilës janë paralajmëruar aktivitete ndërgjegjësuese dhe përkujtimore në disa zona të vendit.
Sipas organizatorëve, “Marshi për Liri” do të jetë një manifestim masiv dhe paqësor, i zhvilluar vetëm pak ditë para shpalljes së verdiktit në Holandë.
Kalendari përfshin gjithashtu “Netët e Lirisë”, me tubime përkujtimore dhe ndezjen e zjarreve simbolike në shtatë zonat operative të dikurshme të UÇK-së. Në kuadër të aktiviteteve është paralajmëruar edhe vendosja e flamujve kombëtarë dhe e emblemës së UÇK-së në pika të ndryshme të Kosovës.
Aktivitetet kanë nisur tashmë në disa prej zonave të dikurshme të rezistencës. Mbrëmjen e 5 shtatorit, në Llap u ndez “Zjarri i Lirisë”, në prani të ish-komandantëve dhe veteranëve.
Ndërkohë, për mbrëmjen e 6 shtatorit, në orën 19:00, është paralajmëruar një tjetër tubim në Kompleksin Memorial “Dëshmorët e Kombit” në Gllogjan.
Aktivitete mbështetëse janë planifikuar edhe në Hagë, ku mbështetësit pritet të mblidhen një natë para shpalljes së vendimit.
Sipas planit të publikuar, grumbullimi në Hagë do të nisë në orën 22:00 të 15 shtatorit dhe do të vijojë deri në fillimin e seancës së 16 shtatorit.