Prezantuesja televizive egjiptiane Sarah Khalifa dhe 11 persona të tjerë janë dënuar me vdekje, pasi u shpallën fajtorë për akuza të lidhura me trafikun e drogës.
Sipas gazetës shtetërore egjiptiane “Al-Ahram”, grupi ishte pjesë e një bande kriminale që importonte lëndë të para për prodhimin e drogës, me qëllim shitjen e saj. Autoritetet u sekuestruan gjithashtu armë dhe municione të paligjshme.
Khalifa, 39 vjeçe, njihet për programin televiziv “Mission Impossible”, që trajtonte çështje të lidhura me krimin. Ajo i ka mohuar akuzat dhe, përmes avokatit të saj, ka bërë të ditur se do të apelojë dënimin me vdekje.
Vendimi ishte shpallur muajin e kaluar, por u konfirmua vetëm pasi gjykata mori opinionin fetar të myftiut të madh të Egjiptit, procedurë e kërkuar ligjërisht në rastet e dënimeve me vdekje.
Gjatë gjyqit, autoritetet thanë se kishin sekuestruar më shumë se 750 kilogramë drogë dhe lëndë të para për prodhimin e saj. Prokuroria paraqiti gjithashtu dëshmi të 20 dëshmitarëve dhe prova elektronike, përfshirë biseda dhe video.
Përveç Khalifas dhe 11 të dënuarve me vdekje, nëntë persona të tjerë janë dënuar me burgim të përjetshëm, ndërsa shtatë janë shpallur të pafajshëm.
Sipas Amnesty International, në Egjipt gjatë vitit 2025 u dhanë 492 dënime me vdekje, ndërsa 23 prej tyre u ekzekutuan.