Dakota Johnson do të luajë Marilyn Monroe , duke marrë përsipër një nga rolet më të kërkuara të karrierës së saj, në filmin e ri Flesh Impact, me regji nga Maggie Gyllenhaal .
Njoftimi u bë të hënën, më 27 korrik, nga prodhuesi i makinave Genesis, i cili po bashkëpunon me Gyllenhaal për të prodhuar filmin, me rastin e 100-vjetorit të lindjes së yllit ikonik.
Sipas njoftimit për shtyp, Dakota Johnson do ta portretizojë Monroe-n në kulmin e famës së saj, ndërsa Ellen Burstyn do të luajë një version tjetër të aktores, “Marilyn-in që bota nuk pati kurrë mundësinë ta njihte”.
Maggie Gyllenhaal shpjegoi se ideja e entuziazmoi që në momentin e parë, pasi personaliteti i Monroe e kishte preokupuar për vite me radhë. “Gjithmonë kam qenë e magjepsur nga Marilyn Monroe. Kur Genesis sugjeroi që të krijonim një projekt përvjetori për 100-vjetorin e lindjes së saj, e dija se doja të bashkëpunoja për ta sjellë këtë histori në jetë”, tha ajo dhe shtoi: “Me Flesh Impact ne paraqesim imazhin e përjetshëm që të gjithë e njohim dhe e duam, përmes një pamjeje moderne që ripërcakton historinë e saj”.
Në një intervistë me Vanity Fair, Gyllenhaal pranoi se fillimisht ngurroi të merrte përsipër drejtimin e një historie kaq të rëndësishme: “Sigurisht që isha në dijeni të performancave të saj më të rëndësishme dhe imazhit publik që ajo kishte gjatë jetës së saj.
Por mendova: “Nuk e di nëse jam gruaja e duhur për këtë punë. Le të presim pak dhe të shohim se çfarë ndodh”.
