Kryesia e Lidhjes Demokratike të Kosovës (LDK), ka miratuar me unanimitet marrëveshjen politike për tejkalimin e krizës institucionale dhe ka mbështetur nominimin e Bekim Sejdiut për President të Republikës së Kosovës.
Në njoftimin e publikuar pas mbledhjes, LDK-ja ka bërë të ditur se vendimi është marrë në përputhje me autorizimet e dhëna nga Kuvendi i partisë dhe përgjegjësitë statutare të Kryesisë.
Sipas LDK-së, marrëveshja politike synon tejkalimin e krizës institucionale dhe përmbylljen e procesit të zgjedhjes së Presidentit, duke garantuar funksionimin e rregullt të institucioneve dhe respektimin e rendit kushtetues.
“Pas shqyrtimit, Kryesia, me unanimitet të plotë, miratoi marrëveshjen e arritur nga ekipi negociues i LDK-së dhe kështu mbështeti nominimin e profesor Bekim Sejdiut për President të Republikës”, thuhet në deklaratë.
LDK-ja ka vlerësuar se zgjedhja e Presidentit nuk lidhet vetëm me një individ, por me ruajtjen e institucioneve të Republikës dhe shmangien e një krize të re politike.
Në deklaratë, partia ka theksuar se Presidenti i ardhshëm duhet të jetë një personalitet me integritet, përgatitje profesionale dhe përvojë institucionale, i cili është në gjendje të përfaqësojë unitetin e popullit.
Për Bekim Sejdiun, LDK-ja ka thënë se i përmbush këto kritere, duke e cilësuar atë si jurist, profesor universitar, diplomat dhe ish-gjyqtar të Gjykatës Kushtetuese.
“Kryesia vlerëson se kandidatura e tij i shërben nevojës së vendit për një President që qëndron mbi ndarjet partiake, respekton me përpikëri Kushtetutën dhe përfaqëson Republikën me seriozitet brenda dhe jashtë vendit”, thuhet në deklaratë.
Kryesia e LDK-së u ka bërë thirrje deputetëve të Grupit Parlamentar që gjatë procesit të votimit të veprojnë në përputhje me autorizimet e Kuvendit të partisë dhe vendimin e Kryesisë.
LDK-ja ka theksuar se do të vazhdojë të veprojë me “maturi, unitet dhe përgjegjësi”, duke vendosur interesin e Republikës së Kosovës mbi konsideratat e tjera.