ChatGPT për adoleshentët, OpenAI forcon masat e sigurisë

Marrëdhënia e adoleshentëve me inteligjencën artificiale po merr një tjetër dimension, ndërsa ChatGPT po përdoret gjithnjë e më shumë jo vetëm për detyra shkollore, por edhe për këshilla personale dhe komunikim.

Për këtë grupmoshë, OpenAI ka prezantuar ChatGPT for Teens, një përvojë e dedikuar për përdoruesit nga 13 deri në 17 vjeç, e cila nisi të shpërndahej globalisht më 18 gusht 2026. Qëllimi është të ofrohet një përdorim më i sigurt i inteligjencës artificiale për të miturit, përmes kufizimeve shtesë dhe mjeteve që mund të përdoren nga prindërit.

Ndryshimi nuk qëndron te një aplikacion i veçantë. Adoleshenti vijon të përdorë ChatGPT, por llogaria mund të kalojë në një përvojë me masa më të forta mbrojtjeje kur sistemi përcakton se përdoruesi është nën 18 vjeç.

Një pjesë e rëndësishme lidhet me përmbajtjet që mund të shfaqen gjatë bisedave. Për përdoruesit e mitur vendosen kufizime më të forta ndaj përmbajtjeve seksuale, dhunës grafike, sfidave të rrezikshme, dietave ekstreme, standardeve të dëmshme të bukurisë dhe rasteve të body shaming. Kufizime të tjera prekin edhe disa forma të roleplay-t romantik apo të dhunshëm.

Por fokusi nuk është vetëm te përmbajtja. Një nga shqetësimet kryesore është mënyra se si një adoleshent mund ta perceptojë një chatbot që i përgjigjet vazhdimisht, ruan kontekstin e bisedës dhe përshtat përgjigjet sipas tij.

Për këtë arsye, përvoja e re synon të shmangë krijimin e një varësie emocionale apo perceptimin e ChatGPT si zëvendësues të miqve, familjes apo marrëdhënieve njerëzore.

Një tjetër funksion i rëndësishëm janë kontrollet prindërore. Prindi ose kujdestari mund ta lidhë llogarinë e tij me atë të adoleshentit dhe të menaxhojë disa parametra të përdorimit. Megjithatë, kjo nuk i jep atij akses të drejtpërdrejtë në historikun e bisedave apo mundësinë për të monitoruar në kohë reale komunikimet.

Në raste të kufizuara, kur identifikohet një rrezik serioz dhe i menjëhershëm për sigurinë, mund të aktivizohen mekanizma njoftimi për prindin e lidhur me llogarinë.

Mes mjeteve të reja është edhe Quiet Hours, përmes të cilit prindi mund të përcaktojë një interval kohor gjatë të cilit ChatGPT nuk mund të përdoret. Për shembull, përdorimi mund të kufizohet gjatë orëve të natës.

Për aspektin shkollor, Study Mode synon ta ndryshojë mënyrën se si AI ndihmon nxënësin. Në vend që të japë menjëherë zgjidhjen e një ushtrimi, sistemi mund ta udhëzojë përdoruesin hap pas hapi, t'i bëjë pyetje dhe ta nxisë të kuptojë procesin e arsyetimit.

Prindërit mund të përcaktojnë gjithashtu Study Hours, gjatë të cilave bisedat e reja hapen automatikisht në këtë modalitet.

Një tjetër element i diskutueshëm është mënyra se si sistemi përpiqet të përcaktojë moshën e përdoruesit. Përveç informacionit të deklaruar nga përdoruesi dhe proceseve të verifikimit, mund të përdoren edhe sinjale të ndryshme që lidhen me llogarinë dhe mënyrën e përdorimit të platformës.

Në rast se një i rritur klasifikohet gabimisht si nën 18 vjeç, ekziston mundësia e verifikimit të moshës dhe rikthimit në përvojën për të rritur.

Kjo qasje hap edhe diskutimin mbi privatësinë: sa informacion duhet të përdorë një platformë për të parashikuar moshën e dikujt dhe çfarë ndodh në rast se sistemi gabon.