Abdixhiku: 6 deputetë të LDK-së nuk e votojnë Sejdiun, Kosova drejt zgjedhjeve

Kryetari i Lidhjes Demokratike të Kosovës, Lumir Abdixhiku, ka deklaruar në një konferencë për shtyp se gjashtë deputetë të LDK-së nuk do ta votojnë marrëveshjen për zgjedhjen e Bekim Sejdiut President të Kosovës.

Sipas Abdixhikut, qëndrimi i këtyre deputetëve e bën të pamundur sigurimin e votave të nevojshme për zgjedhjen e Presidentit, duke e çuar vendin drejt zgjedhjeve të reja.

“Po shkojmë drejt zgjedhjeve”, deklaroi Abdixhiku në konferencën për shtyp.

Përballë kundërshtimit të gjashtë deputetëve, kryetari i LDK-së, Lumir Abdixhiku, ka kërkuar disa herë falje për dështimin e marrëveshjes, ndërsa u ka bërë thirrje deputetëve që nuk e mbështesin kandidaturën e Bekim Sejdiut që të dorëzojnë mandatet.

Në mbledhjen e grupit parlamentar të LDK-së, të zhvilluar këtë të martë, Avdullah Hoti, Hykmete Bjarami, Kujtim Shala, Arben Gashi, Armend Zemaj dhe Janina Ymeri kanë shprehur kundërshtimin ndaj marrëveshjes me Vetëvendosjen për zgjedhjen e Presidentit.

6 deputetët e LDK-së që dolën kundër marrëveshjes me VV-në për Presidentin

Armend Zemaj e ka cilësuar marrëveshjen me Vetëvendosjen si një “kurth” të Albin Kurtit, ndërsa Kujtim Shala ka deklaruar se nuk e përkrah asnjë bashkëpunim politik me Vetëvendosjen.

Kryetari i Lëvizjes Vetëvendosje, Albin Kurti dhe ai i LDK-së, Lumir Abdixhiku arritën një marrëveshje një ditë më parë dhe dolën me emrin e Bekim Sejdiut si kandidat për presidentin e ri të vendit.