Procedura jetëshpëtuese për herë të parë në spital publik, QSUT gati për trombektominë mekanike

Qendra Spitalore Universitare “Nënë Tereza” është gati të ofrojë shërbimin e trombektomisë mekanike për pacientët që kanë mpiksje gjaku në tru. Shërbimi unik është jetëshpëtues dhe ofrohet për herë të parë në sistemin publik.

Arben Rroji, Shef i Shërbimit të Neuroradiologjisë Diagnostikuese dhe Intervencionuese, thotë se edhe stafi është i gatshëm për ta ofruar të plotë këtë shërbim.

“Ne jemi përgatitur për të pritur pacientin e parë për trombektomi, e cila, siç e dimë, është një patologji emergjence. Sigurisht, ne urojmë që të mos kemi shumë pacientë me situata të tilla, por jemi në gatishmëri që mund ta realizojmë trombektominë e parë. Personeli është gati për ta realizuar këtë procedurë, e cila është procedurë që nuk ka alternativë tjetër përveç trombolizës”, tha Arben Rroji.

Trombektomia është vetëm hapi i parë, pasi kabineti pritet të zgjerojë gamën e shërbimeve ndaj pacientit.

“Sigurisht, në këtë kabinet në të ardhmen është sfidë që të kemi dhe trajtime të tjera, siç është trajtimi i aneurizmave, MAV-eve, fistulave, që është një alternativë trajtuese që aktualisht trajtohen në neurokirurgji në QSUT”, tha ai.

Me një potencial prej rreth 200 procedurash të avancuara endovaskulare në vit, Angiografia Biplanare dhe Kabineti i Radiologjisë Intervencionuese forcojnë kapacitetet e QSUT-së për trajtimin e patologjive komplekse neurovaskulare, duke sjellë në vend mundësi të reja për ndërhyrje të shpejta, të sigurta dhe të avancuara.