Prokuroria e Posaçme, SPAK njoftoi të martën më 7 korrik arrestimin e shtetasit Emiljan Burba, i akuzuar si drejtues i një grupi të strukturuar kriminal me veprimtari trafikimin e kokainës nga vendet e Amerikës së Jugut drejt Bashkimit Evropian, si dhe të marijuanës nga Shqipëria drejt Gjermanisë e Turqisë. Pjesë e këtij grupi, sipas SPAK ka qenë edhe Rexhep Rraja, djali i ish-deputetit të Partisë Socialiste, Rahman Rraja.
Në dhjetor të vitit 2025, SPAK njoftoi arrestimin e 10 prej anëtarëve të këtij grupi, mes tyre dhe Rexhep Rrajën, ndërsa katër atëherë u shpallën në kërkim.
Sipas SPAK, nga hetimet ka rezultuar se personat e dyshuar janë përfshirë në aktivitet të paligjshëm të trafikimit të lëndëve narkotike nga Shqipëria drejt Malit të Zi me destinacion final Gjermaninë, nga Shqipëria drejt Turqisë, si dhe nga vendet e Amerikës së Jugut drejt Bashkimit Europian.
Gjatë veprimtarisë së tyre të paligjshme, të dyshuarit kanë komunikuar përmes aplikacionit të enkriptuar “Sky ECC”, prej nga janë siguruar prova për trafikun e narkotikëve.
Të hetuarit akuzohen për trafikimin e 1722 kg marijuanë nga Shqipëria drejt Malit të Zi në nëntor të vitit 2020, ku dhe është sekuestruar lënda narkotike që ka pasur si destinacion përfundimtar Gjermaninë.
Po në atë periudhë, në Holandë është sekuestruar një sasi prej 475 kg kokainë, e dërguar nga Ekuadori në Portin Vlissingen. Në janar të vitit 2021, janë sekuestruar në Turqi 236 kg marijuanë, e dërguar nga Shqipëria. SPAK thekson në njoftim se po vijon hetimet për aktivitetin e grupit.
SPAK bënë me dije se vijon hetimi për administrimin e provave për implikimin e personave të tjerë, që dyshohet të jenë përfshirë në këto veprimtari të paligjshme kriminale.
