Një qytetar i moshuar, pjesë e protestës kundër qeverisë, ka bërë thirrje për vijimin e qëndresës në shesh deri në largimin e Edi Ramës nga pushteti.
Në një prononcim për News24, ai kritikoi ashpër qeverisjen dhe u shpreh se ekziston një hendek i madh mes pushtetarëve dhe qytetarëve të thjeshtë. Sipas tij, ndërsa drejtuesit jetojnë në luks, një pjesë e popullsisë përballet me vështirësi ekonomike.
Duke e cilësuar qeverinë si “neofashiste”, protestuesi tha se qytetarët duhet të vijojnë tubimet dhe të kërkojnë largimin jo vetëm të qeverisë, por të gjithë klasës politike.
“Duhet të rrimë në shesh derisa ta rrëzojmë këtë qeveri. Të gjitha këto parti duhen rrëzuar”, deklaroi ai.
Më tej, ai akuzoi pushtetarët se jetojnë në luks, ndërsa qytetarët e zakonshëm, sipas tij, nuk kanë as të ardhurat e mjaftueshme për nevojat bazë.
Në fund, protestuesi bëri edhe një apel për diasporën dhe kritikoi përfshirjen e figurave të opozitës në këtë lëvizje, duke thënë se protestuesit duhet të kërkojnë mbështetje edhe në Shtetet e Bashkuara.
