Rr. Ismail Qemali, Pallati 18, Kati 1, 1001, Tiranë, Shqipëri
“Shekulli Group”
Marrëveshja mes Lëvizjes Vetëvendosje dhe Lidhjes Demokratike të Kosovës për zgjedhjen e Bekim Sejdiut president ka hasur kundërshtimin e parë të hapur brenda LDK-së.
Ish-kryeministri dhe deputeti i LDK-së, Avdullah Hoti, deklaroi se nuk e mbështet kandidaturën e Sejdiut, duke e cilësuar atë si një zgjidhje që nuk përmbush kriterin e një figure unifikuese dhe që nuk përfaqëson interesat politike dhe parimore të partisë së tij.
“Nuk e përkrah këtë kandidaturë për President të Republikës së Kosovës, jo për arsye personale, por për një parim politik dhe institucional”, deklaroi Hoti.
Sipas tij, presidenti duhet të ndërtojë konsensus përtej interesave partiake dhe të përfaqësojë interesin e përgjithshëm të qytetarëve. Hoti pretendon se mënyra në të cilën është arritur marrëveshja krijon përshtypjen se LDK-ja ka penguar kandidatura të tjera politike vetëm për t’i hapur rrugën një kandidature që, sipas tij, është gjithashtu politike.
“LDK duhet të ketë një qëndrim të qartë, të pavarur dhe të përgjegjshëm. Nuk mund të mbështesim një kandidaturë vetëm për hir të një marrëveshjeje politike, nëse ajo nuk përfaqëson parimet, interesat dhe pritjet e elektoratit të LDK-së”, theksoi Hoti.
Reagimi është goditja e parë serioze ndaj marrëveshjes së arritur mes Albin Kurtit dhe Lumir Abdixhikut. Dy partitë kanë rënë dakord të mbështesin Bekim Sejdiun, profesor të së drejtës, ish-gjyqtar kushtetues dhe ish-diplomat, si kandidat të përbashkët për president. LVV-ja ka 58 deputetë dhe LDK-ja 18, duke arritur së bashku në 76 vota. Atyre u nevojiten edhe votat e së paku katër deputetëve të komuniteteve joshumicë për të siguruar 80 votat e nevojshme në dy raundet e para. Marrëveshja është raportuar edhe nga Reuters.
Formulimi i tij, sidomos akuza se janë penguar “kandidatura të tjera politike”, lë të kuptohet se brenda LDK-së ka pasur emra të tjerë dhe se marrëveshja Kurti–Abdixhiku nuk është pranuar nga të gjitha grupimet e partisë. Deri tani, megjithatë, nuk ka prova publike se sa deputetë të tjerë janë të gatshëm të votojnë kundër ose të mos marrin pjesë në votim.
Votimi për presidentin është i fshehtë, çka do të thotë se drejtuesit e partive nuk mund ta garantojnë plotësisht respektimin e marrëveshjes nga secili deputet. Pikërisht kjo e bën reagimin e Hotit më të rëndësishëm sesa një kundërshtim të zakonshëm politik. LDK dhe VV nuk i kane votat per president.
Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.
KOMUNITETI SHEKULLI ONLINE: https://www.facebook.com/groups/1381242728701899/
.jpg)
