Publikuar më 01.09.2026 nga Shek

Kryetari i Partisë Demokratike, Sali Berisha, ka njoftuar përmes një postimi publik në rrjetet sociale, zhvillimin e një takimi me shqiptarët e Amerikës.

“Freedom Works” – Takimi me shqiptarët e Amerikës, do të mbahet të dielën, më 6 shtator, në orën 11:00, në Bergen Performing Arts Center, në Englewood, New Jersey.

Sipas njoftimit të publikuar, aktiviteti do të zhvillohet në adresën 30 N Van Brunt St, Englewood, NJ 07631.

Ky takim pritet të jetë një tjetër moment i komunikimit të drejtpërdrejtë të Berishës me diasporën shqiptare në SHBA, duke vendosur në fokus marrëdhënien me komunitetin shqiptar përtej Atlantikut dhe mesazhet politike që do të përcillen gjatë këtij aktiviteti.

Kujtojmë se ditën e djeshme Sali Berisha u pajis me vizën amerikane duke i hapur kështu rrugën udhëtimit të tij drejt Shteteve të Bashkuara të Amerikës.

Udhëtimi i Berishës lidhet me pjesëmarrjen e tij në një aktivitet të Partisë Republikane amerikane, i cili pritet të zhvillohet në Dallas më 9 dhe 10 shtator.

Çështja e vizës amerikane vjen në një moment kur në muajt e fundit është diskutuar gjerësisht edhe statusi i Berishës në raport me vendimin e heqjes së “non gratës” të marrë nga Departamenti Amerikan i Shtetit.

Sali Berisha u shpall “non grata” nga DASH më 19 maj të vitit 2021. Në atë kohë, autoritetet amerikane e akuzuan për përfshirje në korrupsion të nivelit të lartë, duke përmendur keqpërdorimin e fondeve publike dhe ndërhyrjen në procese publike për përfitime personale dhe politike.

Vendimi përfshinte edhe familjarë të tij dhe solli ndalimin e hyrjes në territorin e Shteteve të Bashkuara të Amerikës. Berisha e kundërshtoi vendimin, duke e cilësuar atë si politik dhe duke mohuar akuzat e ngritura ndaj tij.

Shpallja “non grata” pati pasoja të rëndësishme në Partinë Demokratike. Në shtator 2021, kryetari i atëhershëm i PD-së, Lulzim Basha, vendosi përjashtimin e Berishës nga grupi parlamentar i partisë. Ky vendim shënoi nisjen e një përplasjeje të fortë brenda PD-së, e cila më pas çoi në lëvizjen e “Rithemelimit” dhe rikthimin e Berishës në krye të partisë.

Në vitin 2023, Berisha u vendos në masën e sigurisë “arrest shtëpie” në kuadër të hetimeve për dosjen “Partizani”. Ai e ka konsideruar këtë proces politik dhe ka mohuar akuzat.

Pas më shumë se një viti, në fund të vitit 2024, Berisha u lirua nga masa e “arrestit në shtëpi” dhe vijoi aktivitetin e tij politik.

Me Berishën në SHBA pritet të udhëtojnë edhe kryetari i Partisë Republikane, Fatmir Mediu, deputetët Belind Këlliçi dhe Albana Vokshi, si dhe Enri Ceno, ekspert për marrëdhëniet ndërkombëtare në Partinë Demokratike.