Publikuar më 02.09.2026 nga Shek

TIRANË– Mbrëmjen e djeshme, në ditën e 94 të Revolucionit Flamingo, protestuesit patën një mundësi ‘të artë’ për përshkallëzimin e qëndresës dhe futjen e kësaj lëvizje në një nivel të ri. Për më shumë se dy orë, qindra protestues mbajtën të rrethuar kryeministrinë, teksa vetë Edi Rama ndodhej në zyrën e tij.

Rreth e qark godinës, përveç qytetarëve të shumtë, u instaluan dhe qindra forca policie, përfshirë FNSH dhe autobotet e ujit, të gatshëm për të shpërndarë turmën. Pas një qëndrese që zgjati për minuta të tëra, dhe thirrjave dhe sfidës që Edi Rama të dilte në Bulevard, një numër i madh protestuesish u shoqëruan dhunshëm nga Policia, përfshirë dhe disa prej atyre që njihen si organizatorë të protesës, Dritan Goxhaj, Arben Kola dhe Edison Lika, së bashku me Arvina Lleshin, një tjetër aktiviste dhe zë i fortë i lëvizjes.

Por pavarësisht shoqërimeve, një pjese e mirë e qytetarëve ishin të vendosur dhe të ulur në rrugë, për të bllokuar të gjitha daljet e kryeministrisë… Deri rreth orës 22:00, kur gjithçka ndryshoi… Në një moment, qytetarët nisën marshimin e përnatshëm, këtë herë në drejtim të komisariateve të policisë, ku ishin shoqëruar aktivistët, duke lënë të lirë daljen për Ramën. Eskorta e kryeministrit, u pa të lëvizte me shpejtësi në Bulevard dhe nën masa të rrepta sigurie, vetëm disa minuta pasi qytetarët kishin nisur marshimin, ndërsa i pari i qeverisë do të bënte disa minuta më vonë një postim në X, që lidhej me Gjermaninë, duke injoruar situatën që kishte ndodhur poshtë zyrës së tij.

Por në këto kushte, kur dje ishte mundësia e përshkallëzimit të protestës, SHEKULLI mëson se në mesin e aktivistëve kanë nisur dyshimet në lidhje me personat që kërkuan që qytetarët të largoheshin nga kryeministria. Ende nuk është identifikuar personi apo personat, që kanë bërë thirrjen e parë për largimin nga Bulevardi, dhe shpërndarjen e qytetarëve përpara komisariateve. 

Kjo lëvizje duket se nuk prodhoi asgjë, pasi Policia njoftoi sot arrestimin e 14 protestuesve, për shkak të bllokimit të lëvizjes së qytetarëve, dhe për bllokimin e hyrje-daljeve të kryeministrisë.

“Më datë 01.09.2026, rreth orës 20:00, një grup pjesëmarrësish në tubim u grumbulluan në rrugën “Ismail Qemali”, në anën jugore të Kryeministrisë, ku bllokuan hyrje-daljet në ambientet e këtij institucioni, në kohën kur aty ndodheshin personalitete të larta shtetërore. Shërbimet e Drejtorisë Vendore të Policisë Tiranë krijuan një kordon sigurie, me qëllim moslejimin e depërtimit të mëtejshëm brenda perimetrit të sigurisë.

Tubuesit vijuan qëndrimin në rrugën “Ismail Qemali”, përpara hyrjes së Kryeministrisë, pavarësisht thirrjeve të vazhdueshme të punonjësve të Policisë, për rreth 30 minuta, nëpërmjet megafonit, për shpërndarjen e tubimit dhe lirimin e rrugës.

Gjithashtu, shërbimet e Policisë, nëpërmjet megafonit, u bënë të ditur pjesëmarrësve në tubim se veprimet e tyre ishin në kundërshtim me ligjin, në cenim të rendit dhe qetësisë publike, si dhe të perimetrit të sigurisë së institucionit të rëndësisë së veçantë. Gjithashtu, iu bë e ditur se, si pasojë e tubimit, ishte penguar qarkullimi i mjeteve të transportit dhe lëvizja e lirë e personaliteteve të larta shtetërore.

Pavarësisht thirrjeve të Policisë, tubuesit vijuan me thirrje dhe veprime aktive për kundërshtimin me forcë të punonjësve të Policisë të planëzuar në kordonin e sigurisë.

Në momentin që punonjësit e Policisë po kryenin zhvendosjen e tubuesve, me qëllim lirimin e hyrje-daljeve të Kryeministrisë dhe lirimin e rrugës, tubuesit bënë rezistencë aktive, u ulën në rrugë, vijuan bllokimin e hyrjes së institucionit dhe të rrugës, si dhe goditën dhe shtynë punonjësit e Policisë”, thuhej në njoftimin e Policisë së Tiranës.

EMRAT E TË ARRESTUARVE

Dritan Goxhaj

Junik Matoshi

Edison Lika

Erlind Almeta

Sokol Bushi

Lulzim Gjini

Valtion Shameti

Florian Manarkolli

Desiderjo Alimucaj

Bora Mitrovica

Arvina Lleshi

Ylli Brahaj

Arben Kola

Aumiraldi Dalliu

Qytetarët kanë bërë thirrjen e vazhdueshme që protesta do të vazhdojë, nën moton “sot edhe më shumë”. /SHEKULLI