Publikuar më 31.08.2026 nga Shek

Shuma financiare që varionin nga 2 milion lekë, deri në 20 milion lekë të vjetra, u janë marrë banorëve të Fushë-Krujës nga e arrestuara Ina Çekaj, si pjesë e skemës së mashtrimit të saj për t’i ndihmuar lidhur me dëmtimet në banesat e tyre nga tërmeti i Nëntorit 2019.

Janë më shumë se 30 persona që kanë rënë viktima të këtij mashtrimi, ku disa prej tyre pasi kanë pritur për një kohë të gjatë, i janë drejtuar drejtorisë së policisë së Tiranës, ku kanë depozituar kallëzim penal ndaj Ina Çekaj.

Kjo e fundit tashmë është arrestuar dhe lënë në masën e “Arrestit në burg” nga gjykata e Tiranës. Ndërsa gjatë kontrollin në një zyrë ku ajo ishte e vetëpunësuar si agjente Imobilare, Ina Çekaj, i janë sekuestruar dokumenta të ndryshme pronësi dhe një kartë identifikimi me emrin e saj dhe të shkruar sipër “Kryeministria”.

Gjatë marrjes në pyetje Ina Çekaj, ka pohuar të gjithë dinamikën e mashtrimeve që kryentë në zonën e Fushë-Krujës, duke treguar se ka pasur një konflikt me Artur Bushin, Kryetar i Bashkisë Krujë, për shkak të një gjobe administrative që sipas saj kishte arritur vlerën 13.000 euro.

Në këtë kuadër deklaroi se kishte marrë shuma monetare nga disa banorë të Fushë-Krujës, konkretisht 400 paund nga M. Baloshi, 1000 euro nga Xh. Seferi, 2000 euro nga T. Leka, 1600 euro nga N. Xhija dhe 8000 euro nga N. Balluku, të cilat sipas saj janë përdorur për pagesën e kësaj gjobe.

Policia, beson se janë më shumë se 30 persona në zonën e Krujës dhe Fushë-Krujës që janë mashtruar nga Ina Çekaj, por ata ngurrojnë të kallëzojnë me shpresën se do arrijnë të marrin sërisht mbrapsht shumat financiare që i kanë dhënë Çekaj.

Sipas deklarimit të kallëzuesve, Ina Çekaj u prezantohej herë si zyrtare pranë kryeministrit, Edi Rama, herë si zyrtare pranë bashkisë së Tiranës dhe herë si zyrtare pranë Entit Kombëtar të Banesave.

Duke u nisur këto mashtrime dhe premtimet e shumta të saj se do arrinte ti mbaronte punë për shtëpitë e dëmtuara nga tërmeti, banorët kanë pranuar ti japin Ina Çekaj, sasi të ndryshme parash dhe euro.

Pas marrjes së lekëve ajo zhdukej, duke e bërë shumë të vështirë kontaktimin e saj. Pasi herë pas here justifikohej se: “…ishte në pritje të ministrit…” apo se: “…kam lëvizur nga kryeministria…” apo se koordinoj projektin “La Mama” të lançuar nga kryeministri Rama…” apo “…herë se jam gazetarë e lirë…” dhe procedura të tjera të lidhura me financat.

Por disa nga banorët duke kuptuar këtë hile të saj, kanë filluar të kryejnë vetë verifikime nëse Ina Çekaj, punonte ose jo pranë institucionit të kryeministrisë, Entit Kombëtar të Banesave apo qoftë dhe në Bashkinë e Tiranës.

Përgjigjet që kanë marrë nga 3 institucionet ishin negative për ta, pasi Ina Çekaj, nuk punonte në asnjë institucion shtetëror. Ndaj dhe disa prej tyre në muajin qershor dhe Korrik 2026, i ajnë drejtuar policisë së Tiranës, duke bërë kallëzim penal ndaj saj.

Pas hetimeve të kryera nga policia, në datën 26 Gusht 2026 është bërë e mundur lokalizimi i saj dhe shoqërimi në ambjentet e policisë ku dhe është marrë në pyetje.

Gazetari Elton Qyno ka mundur të sigurojë dëshminë e Ina Çekaj e cila ka deklaruar se është e vetëpunësuar në agjensinë imobilare fillimisht me emrin “Metropol” dhe më pas në “Cekins Imobiliare” me seli në zonën e ish-parkut pranë “21 Dhjetorit”, aktivitet të cilin ajo deklaron se e ushtron prej rreth 10 vitesh.

Në lidhje me projektin e quajtur “La Mama”, Ina Çelaj deklaroi në polici se nuk ka ekzistuar asnjë projekt i tillë dhe se ajo nuk është prezantuar ndonjëherë me këtë emërtim.

Sipas saj, personat e përfshirë kanë qenë qytetarë të interesuar për përfitimin e banesave sociale apo dëmshpërblimeve për shkak të dëmtimeve të shkaktuara nga tërmeti.

Ina Çekaj, pohoi se rreth muajit qershor të vitit 2024 është kontaktuar nëpërmjet B. Sena, i cili e ka prezantuar me Xh. Seferi.

Më tej, sipas saj, nëpërmjet këtij të fundit janë afruar edhe persona të tjerë me problematika të lidhura me dëmtimet nga tërmeti dhe nevojën për përfitim banese ose dëmshpërblimi.

Deklaroi se ndër personat me të cilët ka pasur komunikime lidhur me këto çështje përfshihen A.Shabani, I. Shabani, A. Shabani, A. Kulla, N. Xhija, L. Sana, D. Tufa, G. Seferi, Xh. Seferi, Dh. Metaj, S. Metaj, S. Metaj, G. Kastrati, L. Balliu, Sh. Balliu, R. Karaj, G. Karaj, M. Baloshi, J. Baloshi, A. Baloshi, G. Tahiri, B. Hysa, N. Balluku, T. Leka, L. Hoxha dhe B. Hoxha.

Në lidhje me B. Sena, Ina Çekaj ka pohuar se e njeh që prej vitit 2017, kohë kur ka punuar si koordinatore pranë zyrës së vëllait të tij, F. Sena, i cili sipas saj administronte një agjenci private investigimi me emrin “Stop Krimi”.

Ndërkohë policia e ka pyetur Ina Çekaj se si do të ndihmonte qytetarët për përfitimin e banesave ose dëmshpërblimeve, e arrestuara pohoi se kishte një person të njohur pranë Entit Kombëtar të Banesave, me të cilin do të komunikonte për t’i ndihmuar këta banorë.

Këtë person të njohur të saj, ajo nuk pranoi ta tregojë para oficerëve të policisë.E pyetur nëse mund të përmendë persona që sipas saj kishin përfituar banesa ose dëmshpërblime falë ndërhyrjes së saj, deklaroi se ndër ta ishin vëllezërit L.Hoxha dhe B. Hoxha, të cilët sipas saj kishin përfituar dëmshpërblim pranë Ministrisë së Financave, por më pas e kishin mohuar këtë fakt dhe e kishin kërcënuar se do ta denonconin në media.

Tashmë ndaj Ina Çekaj është marrë masa e “Arrestit në burg” pasi ndaj saj policia dhe prokuroria ka nisur hetimet për akuzën e “Mashtrimit më shumë se njëherë”.