Irene Papas ishte një nga aktoret më të njohura greke dhe një figurë e rëndësishme e kinemasë ndërkombëtare. Ajo lindi më 3 shtator 1926 në Chiliomodi, pranë Korinthit, me emrin Irene Lelekou. Nëna e saj ishte mësuese, ndërsa babai jepte mësim për dramaturgjinë klasike. Talenti i saj u zbulua nga regjisori Elia Kazan.

Gjatë një karriere që zgjati rreth pesëdhjetë vjet, Papas interpretoi në më shumë se 70 filma. Ajo u bë e njohur edhe për publikun shqiptar përmes rolit të Penelopës në filmin Odisea, ku luajti së bashku me aktorin shqiptar Bekim Fehmiu. Një tjetër rol i rëndësishëm ishte ai në filmin Zorba the Greek, ku interpretoi përkrah Anthony Quinn.

Irene Papas u dallua veçanërisht në filmat me tema nga mitologjia dhe historia greke. Ajo interpretoi personazhe të njohura si Helena e Trojës, Klitemnestra, Elektra dhe Antigona. Këto role e forcuan reputacionin e saj si një aktore me një prani të fuqishme skenike.

Ndër filmat më të njohur të saj janë Zorba the Greek, Z, The Guns of Navarone, Antigone, Electra, L’Odissea, The Trojan Women dhe Anne of the Thousand Days.

Për punën e saj artistike, Papas mori vlerësime dhe çmime të shumta ndërkombëtare. Në vitin 1962 ajo fitoi çmimin për aktoren më të mirë në Festivalin Ndërkombëtar të Filmit në Selanik për rolin në Electra. Ajo u nderua gjithashtu me çmime për karrierën në festivale dhe institucione të ndryshme ndërkombëtare.

Irene Papas ishte e admiruar edhe nga figura të mëdha të kinemasë. Federico Fellini ishte një nga admiruesit e saj, ndërsa Katharine Hepburn e cilësoi si një nga aktoret më të mira në historinë e kinemasë.

Irene Papas u nda nga jeta më 14 shtator 2022, në moshën 96-vjeçare. Ajo la pas një trashëgimi të rëndësishme artistike dhe mbetet një nga emrat më të njohur të kinemasë greke dhe evropiane./KultPlus.com