Ambasada e Shteteve të Bashkuara në Tiranë ka përkujtuar sot shenjtërimin e Nënë Terezës, duke vënë në pah kontributin e saj të jashtëzakonshëm në ndihmë të njerëzve në nevojë dhe përkushtimin ndaj më të pambrojturve.
Në një reagim të publikuar në rrjetet sociale, ambasada amerikane ka sjellë në vëmendje veprën e Nënë Terezës dhe mesazhin që ajo përcolli gjatë gjithë jetës së saj, duke iu kushtuar të varfërve, të sëmurëve dhe personave të lënë pas dore nga shoqëria.
Sipas Ambasadës së SHBA-së, historia e Nënë Terezës mbetet një shembull i fuqishëm i vlerës së shërbimit ndaj të tjerëve, përtej statusit apo pozitës shoqërore.
“Sot kujtojmë shenjtërimin e Nënë Terezës, një grua që e kaloi jetën pranë më të varfërve, të sëmurëve dhe të harruarve, duke i kujtuar botës se madhështia gjendet te shërbimi, jo te statusi”, thuhet në mesazhin e ambasadës amerikane në Tiranë.
Në reagim është përfshirë edhe një vlerësim i Presidentit të Shteteve të Bashkuara, Donald Trump, për figurën e Nënë Terezës.
“Ajo përfaqëson më të mirën tek të gjithë ne”, citohet të jetë shprehur Trump për Nënë Terezën.
Figura e Nënë Terezës vijon të mbetet një nga emrat më të njohur shqiptarë në botë, ndërsa vepra e saj humanitare dhe mesazhi për solidaritet, përkujdesje dhe shërbim ndaj njerëzve në nevojë vazhdojnë të kujtohen në përvjetorë dhe data të rëndësishme.
