Një situatë e rrezikshme është raportuar në fshatin Qinam të Tiranës, ku një zjarr është përhapur në afërsi të një depoje ku mbahen lëndë plasëse.
Prania e flakëve pranë këtij objekti ka shkaktuar alarm të menjëhershëm, ndërsa në zonë janë angazhuar forcat e emergjencës për të parandaluar përshkallëzimin e situatës dhe çdo pasojë të mundshme.
Menjëherë pas marrjes së njoftimit, në vendngjarje janë dërguar efektivë të Policisë së Shtetit, shërbimet zjarrfikëse dhe autoambulanca. Forcat e angazhuara po ndërhyjnë për të kufizuar përhapjen e flakëve dhe për të izoluar vatrën e zjarrit.
Rreziku lidhet veçanërisht me afërsinë e zjarrit me depon ku ruhen lëndë plasëse, çka ka bërë që ndërhyrja të kryhet me masa të shtuara sigurie.
Deri në këto momente, autoritetet vijojnë punën në terren për neutralizimin e situatës. Pritet që në vijim të ketë më shumë informacion mbi shkaqet e zjarrit, përmasat e tij dhe nëse ka pasur dëme materiale apo persona të rrezikuar.
