Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
“Ndaloni marrëzitë tuaja!”, Luan Baçi thirrje mazhorancës: Tërhiquni nga ndryshimet që prekin invalidët
PiranjatPërditësimi i fundit 1 Shtator 2026, 12:35
Deputeti Luan Baçi ngre shqetësimin për ndryshimet e propozuara në ligjin për nxitjen e punësimit, duke i cilësuar diskriminuese ndaj invalidëve të punës dhe personave me aftësi të kufizuara.
Baçi u bën thirrje deputetëve të mazhorancës të ndalojnë miratimin e tyre, ndërsa thekson se ulja e kuotave të punësimit dhe e detyrimeve për punëdhënësit përbën regres për këtë kategori. Reagimi i plotë:
Po e postoj shqetësimin serioz për invalidët dhe PAK, ashtu siç ma kanë dërguar!
Ju bëj thirrje deputetëve të mazhorancës të ndalojnë në marrëzitë e tyre!
Më poshtë, SMS-ja e dërguar nga kategoria e vuajtur dhe e lënë pas dore, si dhe kategoritë e tjera nga kjo mazhorancë: “Ne qoftë se këto ndryshime do të miratohen, zoti Luan, kërko një shtesë kur shteti të na nxjerrë një ligj që të na vrasin, që të mos vuajmë, por të vdesim me dinjitet, se mbase ky shtet dhe ju të gjithë si ligjvënës e keni më të lehtë këtë gjë, meqë nuk keni mundësi që të na e bëni më të lehtë jetën për të jetuar.”
“Të nderuar kolegë, invalidë të punës!
Të nderuar persona me aftësi të kufizuara!
Ministria e Ekonomisë ka ditë që ka nxjerrë një projektligj për diskutim publik, që cenon dhe prek drejtpërdrejt interesat e invalidëve të punës dhe të PAK. Projektligji i propozuar nga Ministria e Ekonomisë: ‘Disa shtesa dhe ndryshime në ligjin nr. 15/2019, “Për nxitjen e punësimit”’.
Ne e kemi diskutuar projektligjin me të gjithë ekspertët e shoqatës dhe ekspertë të cilët dikur kanë punuar në këto institucione, por sot janë në pension. Po kështu, jemi konsultuar edhe me kolegët tanë evropianë. Si përfundim, ky ndryshim është një diskriminim për invalidët dhe PAK.
Në projektligj, në nenin 18, ‘Dispozita tranzitore’ (në fakt, që këtu fillon padrejtësia), propozohet që punëdhënësi, për çdo 125 punonjës, duhet të punësojë një invalid pune dhe një invalid me gjendje shëndetësore më të rënduar.
Ka qenë më përpara: punëdhënësi, për çdo 24 punonjës, duhet të punësojë një invalid pune dhe, për çdo 25 punonjës, një invalid me gjendje shëndetësore më të rënduar. Aktualisht, në nenin 20, përcaktohet: punëdhënësi, për çdo 25 punonjës, duhet të punësojë një invalid pune dhe, për çdo 50 punonjës, një invalid me gjendje më të rënduar shëndetësore.
Ndryshimet e propozuara mohojnë të drejtat elementare të invalidëve të punës dhe të PAK. Kujtojmë se edhe në vitin 2019 është dashur ndërhyrja e Kryeministrit për t’i thënë jo diskriminimit të invalidëve.
Ndryshime të tilla na çojnë në regres të madh, si në bazë rajoni, pa llogaritur vendet evropiane. Ne sot kemi mbi 13 000 invalidë pune të pjesshëm (me të drejtë pune), me 6 orë dhe 8 orë punë të lehtë.
Ministria duhet të merrte një nismë për t’i punësuar këta invalidë, ku do të integroheshin në shoqëri, do të sillnin të mira financiare në familje, por edhe do të kontribuonin në fondin e sigurimeve. Ky do të ishte progres dhe jo regres. Ndryshimi i ligjit duhet të ishte në këtë drejtim.
Po kështu, në pikën 2 të këtij neni thuhet: ‘Punëdhënësi që nuk punëson kuotat e përcaktuara më lart detyrohet të derdhë në fondin social 50% të pagës minimale.’
Aktualisht është: ‘Punëdhënësi, nëse nuk punëson numrin e invalidëve sipas ligjit, do të derdhë në fondin social pagën minimale çdo muaj.’
Edhe këtu, Ministria e Ekonomisë ka gabuar.
Ju informojmë se ndryshimet e bëra në këtë ligj nuk mbështesin invalidët, por i diskriminojnë ata me ligje. Ndryshimet e bëra bien ndesh me disa ligje të tjera dhe, mbi të gjitha, me Konventën e OKB-së për PAK.
Ne do ta kontestojmë me të gjitha rrugët demokratike.
Me shumë keqardhje u drejtohem këtyre hartuesve: Kujt i intereson të krijojë pakënaqësi me veprime artificiale?”
