Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Tedi Blushi kërkon pezullimin e dy taksave: Ulni çmimin e naftës dhe ktheni paratë në xhepat e shqiptarëve
PiranjatPërditësimi i fundit 1 Shtator 2026, 14:56
Sekretari i Përgjithshëm i Partia e Lirisë, Tedi Blushi, kërkon ndërhyrjen e qeverisë për uljen e çmimit të karburanteve. Në një reagim publik, Blushi kërkoi pezullimin e Taksës së Qarkullimit dhe Taksës së Karbonit, duke argumentuar se masa do të sillte ulje të menjëhershme të çmimit të naftës për qytetarët dhe bizneset.
Sipas tij, çmimi i naftës në Shqipëri ka arritur në 219 lekë për litër, ndërsa vendet fqinje kanë ndërhyrë me masa fiskale për të frenuar rritjen e kostove.
Blushi solli si shembuj Maqedoninë e Veriut dhe Malin e Zi, ku sipas tij janë ndërmarrë masa për uljen e çmimit të karburanteve.
Ai kërkoi që mazhoranca të rikthejë për shqyrtim dhe votim projektligjin e depozituar më herët nga Partia e Lirisë për pezullimin e dy taksave.
Një pjesë e rëndësishme e argumentit të Blushit lidhet me peshën që karburantet kanë në ekonominë e familjeve dhe bizneseve. Sipas tij, rritja e çmimit të naftës nuk ndalet te pika e karburantit, por përcillet edhe te transporti, prodhimi dhe çmimet e produkteve të shportës.
“Çdo rritje e tij transmetohet zinxhir në të gjithë ekonominë, duke rritur koston e transportit, të prodhimit, të shërbimeve dhe, mbi të gjitha, çmimin e produkteve bazë që qytetarët blejnë çdo ditë.”-u shpreh ai.
Blushi argumenton gjithashtu se taksat zënë rreth 60% të çmimit të naftës. Sipas tij, vetëm Taksa e Qarkullimit është 27 lekë për litër, ndërsa me TVSH-në arrin në rreth 32 lekë për litër.
Në reagimin e tij, sekretari i Përgjithshëm i Partisë së Lirisë u ndal edhe te kostot që qytetarët përballojnë për automjetet dhe rrugët.
Ai pretendon se shqiptarët paguajnë për rrugët përmes taksave të automjeteve dhe më pas përmes Taksës së Qarkullimit të përfshirë në çdo litër karburant.
Një tjetër argument lidhet me koston e jetesës. Blushi solli të dhëna për peshën e ushqimeve në buxhetin familjar dhe pagat në Shqipëri, duke kërkuar masa që, sipas tij, do të lehtësonin familjet dhe bizneset.
Në fund, ai kërkoi që projektligji i Partisë së Lirisë për pezullimin e taksave të rikthehet në Kuvend dhe të votohet.
“Pezulloni Taksën e Qarkullimit, pezulloni Taksën e Karbonit, ulni çmimin e naftës dhe ktheni paratë në xhepat e shqiptarëve”, është kërkesa e Blushit.
