Një nga projektet më të rëndësishme energjetike të rajonit po zgjerohet drejt Ballkanit Perëndimor, por Shqipëria dhe Kosova mbeten jashtë aksit të ri.
Përfaqësuesit e operatorëve të sistemeve të gazit do të firmosin nesër në Selanik Memorandumin e Bashkëpunimit për përfshirjen e Serbisë dhe Maqedonisë së Veriut në Korridorin Vertikal të Gazit.
Zgjerimi krijon një degë të re të korridorit, krahas aksit ekzistues që lidh Greqinë me Bullgarinë, Rumaninë, Moldavinë dhe Ukrainën.
Rruga e re do të kalojë nga Greqia drejt Maqedonisë së Veriut dhe Serbisë, me perspektivën që më pas të lidhet me tregjet e Hungarisë dhe Austrisë.
Një nga hallkat kryesore është interkoneksioni Greqi–Maqedoni e Veriut, i cili është në ndërtim dhe synohet të hyjë në operim tregtar deri në fund të vitit 2027.
Ndërkohë, gazsjellësi Maqedoni e Veriut–Serbi pritet të përfundojë në vitin 2028, duke e kthyer Shkupin nga një destinacion fundor të gazit në një vend tranzit drejt veriut.
Për Serbinë, projekti krijon një portë të re furnizimi nga jugu dhe mundësi për të reduktuar varësinë nga gazi rus.
Në qendër të skemës është edhe terminali lundrues LNG në Aleksandrupoli, përmes të cilit mund të furnizohen tregjet veriore me gaz të lëngshëm, kryesisht nga SHBA, por edhe me gaz azer që mbërrin në Greqi përmes TAP.
Maqedonia e Veriut ka rezervuar tashmë katër slote në terminalin e Aleksandrupolit, ndërsa kompania serbe Srbijagas ka siguruar kapacitet prej rreth 300 milionë metër kub në vit për dhjetë vitet e ardhshme.
Kapaciteti i planifikuar i lidhjes Maqedoni e Veriut–Serbi vlerësohet mes 3 dhe 6 miliardë metër kub gaz në vit.
Ndërsa Greqia po konsolidohet si porta energjetike e rajonit dhe Serbia e Maqedonia e Veriut fitojnë një rol të ri në transportin e gazit drejt Europës Qendrore, Shqipëria nuk figuron në zgjerimin e ri të Korridorit Vertikal.
Kjo e lë vendin jashtë këtij aksi të ri rajonal në një moment kur vendet e Ballkanit po investojnë në lidhje të reja për diversifikimin e furnizimit dhe reduktimin e varësisë nga gazi rus./skyweb.al
