Ministri i Mbrojtjes, Ermal Nufi, ka deklaruar nga Himara se situata e krijuar nga zjarret është qetësuar dhe tashmë është nën kontroll.
Nufi, i cili ka ndjekur nga afër operacionin gjatë natës, tha se në terren janë angazhuar qindra forca dhe mjete për përballimin e flakëve, ndërsa ndërhyrja nga ajri ka nisur në orët e para të mëngjesit.
“Nga Himara një situatë totalisht e qetësuar, një situatë totalisht e menaxhuar. Mbi 170 forca nga Forcat e Armatosura, mbi 300 zjarrfikës, mbi 21 zjarrfikëse kanë qenë në territorin e Himarës. Ndërhyrja nga ajri ka filluar që në orën 6 e gjysmë të mëngjesit”, deklaroi ministri.
Sipas tij, gjatë operacionit janë shmangur pasoja më të rënda, ndërsa nuk është regjistruar asnjë humbje jete apo dëmtim i bizneseve. Megjithatë, gjashtë banesa janë përfshirë nga flakët.
Në 24 orët e fundit, në operacionet për përballimin e situatës janë angazhuar 881 forca operacionale, 75 automjete zjarrfikëse dhe 340 efektivë të Forcave të Armatosura, me mbështetjen e mjeteve ajrore.
Sot operacioni vijon me 380 forca ushtarake, dy helikopterë dhe një avion “Air Tractor”.
Në Fier dhe Himarë, ku situata ka qenë më e rënduar, rreziku për zonat e banuara është shmangur, ndërsa forcat në terren vijojnë monitorimin dhe ndërhyrjet për shuarjen e plotë të vatrave.