Këmbësorët në Itali që kalojnë rrugën ndërsa përdorin telefonat e tyre së shpejti mund të gjobiten.
Ministria italiane e Transportit po propozon një masë të re brenda Ligjit për Sigurinë Rrugore për të rritur sigurinë dhe për të zvogëluar situatat e rrezikshme, raporton The Guardian.
Drafti i ligjit të ri, i cili pritet të miratohet deri në mesin e tetorit, prezanton gjoba prej 75 eurosh për këmbësorët që përdorin telefonat e tyre ndërsa kalojnë rrugën.
Masa synon të zvogëlojë numrin e aksidenteve që ndodhin për shkak se shoferët nuk reagojnë në kohë.
Ky ndryshim ligjor vjen pas një sërë vendimesh gjyqësore në të cilat përgjegjësia për aksidentet rrugore u atribuohet këmbësorëve të pakujdesshëm. Ndalimi nuk vlen vetëm për telefonat celularë, por edhe për pajisje të tjera elektronike si laptopë, tableta dhe kamera dixhitale.
Sipas pjesëve të draftit të publikuara nga mediat italiane, ligji parashikon edhe disa përjashtime. Këmbësorëve do t’u lejohet të përdorin telefona celularë në raste urgjente dhe të flasin përmes pajisjeve pa duar ndërsa kalojnë rrugën. Mbajtja e kufjeve do të lejohet gjithashtu, por vetëm nëse ato nuk ndërhyjnë në dëgjimin në të dy veshët. Është e rëndësishme të theksohet se ndalimi vlen vetëm për kalimin e rrugës dhe jo për ecjen në trotuar.
Projektligji gjithashtu prezanton detyrime shtesë për këmbësorët. Para se të kalojnë rrugën, ata do të duhet të kontrollojnë nëse shoferi i ka vënë re dhe nëse ka ndërmend të ndalet. Ai gjithashtu thotë se këmbësorët nuk duhet të hezitojnë kur kalojnë.
Gjoba të ngjashme për këmbësorët që përdorin telefona celularë gjatë kalimit të rrugës u futën nga Lituania në vitin 2018. Qyteti i parë në botë me rregullore të tilla ishte Honolulu në vitin 2017, dhe qyteti japonez i Yamato ndoqi shembullin në vitin 2020.
Ligji i ri parashikon dënime shumë më të rrepta për shoferët që përdorin telefon celular gjatë drejtimit. Për një shkelje të përsëritur, gjoba mund të arrijë në 2,588 euro dhe përfshin gjithashtu heqjen e patentës së shoferit për një deri në tre muaj. /tesheshi.com/
