Vladimir Putin nuk tregon as më të voglën prirje për negociata që do t’i japin fund luftës në Ukrainë, duke akuzuar Kievin për terrorizëm shtetëror dhe duke goditur përsëri portin e Odesës sot, të mërkurën, në orët e para të mëngjesit.
Pavarësisht deklaratave maskuese se Moska është e hapur për bisedime, presidenti rus tha mbrëmë nga Kirgistani se paralajmërimi i Presidentit ukrainas Volodymyr Zelensky drejtuar linjave ajrore se dronët ukrainas po e bëjnë hapësirën ajrore ruse të rrezikshme dhe në thelb të mbyllur, i ngjan “terrorizmit shtetëror”, duke shtuar se Moska do të gjejë mënyrën e duhur për të reaguar.
Organizatës së Bashkëpunimit të Shangait, Putin i tha Kievit se negociatat me “terroristët” janë të pamundura.
Ai pranoi se dronët ukrainas kanë shkaktuar shumë dëme në Rusi dhe u përqendrua veçanërisht në sulmet ndaj anijeve dhe rafinerive ruse. Ai tha se Ukraina kishte goditur rreth 100 anije në 40 ditë, me koston e dëmit ekuivalente me 1% të PBB-së. Ai shtoi se dëmi në shumicën e rafinerive është riparuar tashmë dhe riparimet janë ende të nevojshme në 10% të objekteve që u goditën.
Bombardimet ruse të portit kritik të Odessas në Detin e Zi sot, të mërkurën, plagosën të paktën tetë civilë – përfshirë një fëmijë – dhe dëmtuan një numër ndërtesash.
“Një natë e vështirë për Odesën. Armiku ka nisur përsëri një sulm masiv ndaj qytetit. Infrastruktura është dëmtuar. Për momentin, dihet se tetë persona janë plagosur, përfshirë një fëmijë. Dy persona janë shtruar në spital”, tha në një postim Serhiy Lysak, kreu i komandës ushtarake rajonale të Odesës.
Z. Lisak shtoi se një ndërtesë banimi 24-katëshe u dëmtua. Apartamente në disa kate u shkatërruan. Dritaret u thyen në ndërtesat aty pranë, ndërsa makinat u dëmtuan.
Gjithashtu, sipas tij, u shkatërruan ndërtesa zyrash dhe dy institucione arsimore.
